विश्वकप २०१८

उत्तर कोरियाली नेता बेइजिङ भ्रमणय्

एजेन्सी- उत्तर कोरियाया नेता किम जङ अन अप्रत्याशित रुपं बेइजिङ वनाच्वंगु खँ पिहां वंगु दु । बेइजिङय् उत्तर कोरियाया छम्ह उच्च अधिकारी वनाच्वंगु खँ पिहां वःबलय् उम्ह अधिकारी सर्वोच्च नेता किम जङ अन हे जूगु अनुमान यानाहःगु खः ।

दकलय् न्हापां जापानी संचारमाध्यमं छम्ह उत्तर कोरियाली कुटनीतिज्ञ रेलपाखें बेइजिङ वंगु व कडा सुरक्षा दथुइ चिनिया नेतातय्त नापलानाच्वंगु समाचार पितबिउगु खः । दक्षिण कोरियाया अधिकारीतय्सं उम्ह उच्च अधिकारी सु जूगु धयागु म्हसीके मफयाच्वंगु, तर थःपिं सावधानीपूर्वक निगरानी धयाच्वनागु खँ धाःगु दु ।

यदि थ्व उच्च अधिकारी धाःम्ह किम जङ अन हे जूसां सन् २०११ सत्ताय् वयेधुंकाः वय्कःया थ्व न्हापांगु विदेश भ्रमण जुइ ।थ्व अधिकारी किम जङ अन जूगु अनुमानत सार्वजनिक जुयाच्वंसां चीन व उत्तर कोरियां धाःसा थुकिया बारे छुं औपचारिक प्रतिक्रिया बिउगु मदुनि । तर थ्व भ्रमणयात शान्ति वार्ताया महत्वपूर्ण विकासक्रम कथं कयाच्वंगु दु ।

अमेरिकी राष्ट्रपति डोनाल्ड ट्रम्प व उत्तर कोरियाली नेता किम दथुइ वइगु महिनाय् शिखर वार्ता जुइत्यंगु दु । किमं राष्ट्रपति ट्रम्पं छ्वयाहःगु निमन्त्रणा स्वीकार यायेधुंकूगु दु ।

थुकिया हे तयारी स्वरुप किमं बेइजिङ भ्रमण याःगु अनुमान जुयाच्वंगु दु । ट्रम्प लिसेया वार्ता न्ह्यः उत्तर कोरियां चिनिया नेतातलिसे खँल्हाबल्हा याइगु विश्लेषकतय्सं न्हापा हे धया वयाच्वंगु खः । चीन उत्तर कोरियाया मू आर्थिक साझेदार खः ।

सम्बन्धित बुखँ

LEAVE YOUR COMMENTS