सक्वय् महाकवि गिरिजाप्रसादया झ्वाता

येँ – नेपालभाषाया महाकवि गिरिजाप्रसाद जोशीया झ्वाता अनावरण याःगु दु । महाकवि जोशीया ८० क्वःगु बुन्हिया लसताय् लाकाः वय्कःया हे जन्मस्थल सक्वय् झ्वाता पलिस्था याःगु खः । उगु झ्वाता वरिष्ठ संस्कृतिविद्लिसें वाङ्मय शताब्दी पुरुष सत्यमोहन जोशीं अनावरण यानादीगु खः । उगु इलय् नवासें वय्कलं नेपालभाषाया श्रृवृद्धि यायेगु ज्याय् महाकवि जोशीं महत्वपूर्ण योगदान बियादीगु खँ कनादिल । िज्याझ्वःया मूपाहां जोशीं मदुम्ह महाकवि जोशी म्हो इलय् हे मदुसां वय्कलं नेपालभाषा व साहित्यया श्रीवृद्धिया निंतिं बाखं, काब्य, चिनाखँ, म्येँ, उपन्यास, नाटक आदि विधाय् साहित्यया रचना यानादीगु धइगु हे वय्कःया तःधंगु योगदानया रुपय् कायेमाः धयादिल । महाकवि गिरिजाप्रसाद जोशीं ‘ल्वहंमा’ महाकाव्य शास्त्रीय सिद्धान्तय् आधारित जुयाः रचना यानादीगु जानकारी नं बियादीगु खः । महाकवि गिरिजाप्रसाद जोशीया उगु झ्वाता सक्व कृषि फार्मया संस्थापक इन्जिनियर राजदास श्रेष्ठं निर्माण यानादीगु खः ।

थ्व हे झ्वलय् नेपालभाषाया नांजाःम्ह जनकवि दुर्गालाल श्रेष्ठ व आख्यानकार मथुरा साय्मिं निर्मला श्रेष्ठ व भ्यालेन्टिना श्रेष्ठया नामय् नीस्वंगु सपूmकुथिया नं उलेज्या यानादीगु खः । निर्मला श्रेष्ठया नामय् नीस्वंगु सपूmकुथिइ नेपालभाषा व भ्यालेन्टिना श्रेष्ठया नामय् नीस्वंगु सपूmकुथिइ थीथी भाय्या सपूmत संग्रह यानातःगु दु । उगु इलय् मूपाहां जोशीं निम्हं साहित्यकारयात नं सम्मान यानादीगु खः ।ज्याझ्वलय् नेपालभाषा व खस् भाय्या चिनाखँ कासा नं याःगु खः । नेपालभाषाया चिनाखँ कासाय् प्रेममान चित्रकार न्हाप, रामकृष्ण सिंह लिउ व भूपेन्द्रमन श्रेष्ठ लियांलिउ लाःगु खःसा श्रीलक्ष्मी श्रेष्ठ व नरेन्द्रमान किपूनं हःपाः सिरपाः त्याकादीगु खः । वय्कःपिंत छसिकथं न्याद्वः, प्यद्वः, स्वद्वः व निद्व निद्वः तका दांलिसें दसिपौ लःल्हाःगु खः । अथे हे खस् भाय्या उत्कृष्ट चिनाखँया निंतिं कान्छाप्रसाद तिवरीयात नं न्याद्वः तका दांलिसें दसिपौ लःल्हाःगु खः । वि.सं. १९९५ चैत कृष्ण द्वादशी कुन्हु सक्वय् जन्म जुयादीम्ह महाविक गिरिजाप्रसाद जोशी २०४४ साल भदौ २२ गते मदुगु खःसा वय्कःया स्वंगू दर्जनं मल्याक कृति पिहां वये धुंकूगु वय्कःया काय यचु जोशीं जानकारी बियादीगु दु ।

सम्बन्धित बुखँ

LEAVE YOUR COMMENTS