लण्डनय् रञ्जना लिपि

बेलायतय् नं रञ्जना लिपि स्यनेगु ज्या जुल । नेपालभाषाया छगू सुन्दर लिपि कथं नांजाःगु रञ्जना लिपि बारे जानकारी यायेगु व थुकिया सामान्य ज्ञान बीत बेलायतया लण्डनय् नकतिनि छगू कार्यशाला गोष्ठी जूगु खः । वल्र्ड नेवाः अर्गनाइजेशन (डब्लुएनओ) युके च्याप्टरया ग्वसालय् जूगु उगु कार्यशालाय् नेपाःमि स्वयां नं बेलायतीतय्सं अप्वः रुची क्यंगु खः ।
डब्लुएनओ युकेया कजि संयुक्त श्रेष्ठं निघौ कक्षा कयाः रञ्जना लिपि च्वयेगु विधि स्यनादीगु खः । उगु इलय् सहभागीतय्सं रञ्जना लिपिया गरिमा व इतिहास बारे सीकेगु लिसें थ्व लिपिं थःथःगु नां च्वये सयेकूगु खः । उगु इलय् रञ्जना लिपियात कलात्मक ढंगं च्वयातःगु क्यालिग्राफीया थीथी किपा नं क्यनेगु ज्या जूगु खः । उकी खास यानाः नेपाःया कलाकारपिं समरदिप, आनन्द महर्जन व विमल बोलाखेपिंसं च्वयातःगु रञ्जना लिपिया क्यालिग्राफीया ब्वज्या याःगु खः । ज्याझ्वःया सहभागीपिं रञ्जना लिपिया गरिमा न्यनेधुंकाः उगु हे लिपिं थःथःगु नां च्वये सःगुलिं अतिकं उत्साहित जूगु खः ।
खुगूगु निसें न्हय्गूगु शताब्दीपाखे नेपालभाषा व संस्कृतया ग्रन्थ च्वयेगु लागिं छ्यलेगु याना वयाच्वंगु थुगु लिपिं इतिहासय् यक्व हे थथ्याःक्वथ्याःया सामना याये माःगु खःसां थौंकन्हय् धाःसा ल्याय्म्ह पुस्ताया दथुइ थ्व लिपिप्रति हानं जागरण ब्वलना वःगु दु ।
थ्वहे वइगु मार्च ३१ तारिख कुन्हु नेपालय् जुइगु न्हापांगु ‘विश्व नेवाः दिवस’ या लसताय् लाकाः बेलायतय् थ्व लिपि स्यनेज्या जूगु खः । रञ्जना लिपि स्यनेत जूगु थज्याःगु ज्याझ्वः युरोपय् हे न्हापांगु खः । ज्याझ्वलय् ‘मतिना’ पिथनाया मू सम्पादक शशि महाजु मूपाहां कथं झाःगु खः । यक्वस्यां रुची तःगु जुयाः थज्याःगु ज्याझ्वः
लिपा हानं यायेगु बचं ग्वसाः खलकं बिउगु दु । लण्डनया आर्ट पेभेलियोन्सय् जूगु उगु ज्याझ्वःयात यन्त्रकला, आर्ट क्याचर व टावर ह्याम्लेट काउन्सिल अफ लण्डन लिउ ग्वसाःखलः जुयाः ताःलाकूगु खः ।

सम्बन्धित बुखँ

LEAVE YOUR COMMENTS