ख्वप राजधानी दयेके मजिउ

देसय् न्हापांखुसी संघीय व्यवस्थायात संस्थागत यायेगु झ्वलय् प्रदेश सभाया निर्वाचन क्वचाःगु दु । प्रदेशसभाया निर्वाचनय् उम्मेदवार जूपिं आपालं धइथें उम्मेदवारतय्सं अबलय् थःपिं त्यानावन धाःसा थःपिनि जिल्लाय् हे प्रदेशया राजधानी तयेगु निंतिं पहल यायेगु प्रतिबद्धता प्वंकूगु खः । उकिं यानाः आः थीथी राजनीतिक पार्टीं त्याकावःपिं प्रदेशसभाय् विजयी सदस्यतय्सं बाध्य जुयाः हे थःपिं न्ह्यःने च्वनाः प्रदेश राजधानी थःपिनि हे जिल्लाय् हयेगु आन्दोलन न्ह्याकाच्वंगु दु । जिल्ला जिल्लाय् थ्व आन्दोलन यानाच्वंगु कारणं सरकारयात अस्थायी राजधानी तोके यायेत तकं थाकुयाच्वंगु दु । शहरी विकास मन्त्रालयं थीथी जिल्लाया अध्ययन यानाः प्रतिवेदन तकं बुझे यायेधुंकूगु अवस्थाय् तकं सरकार प्रदेशया अस्थायी राजधानी घोषणा यायेत लिचिलाच्वंगु दु ।
थ्व झ्वलय् ३ नम्बर प्रदेशया राजधानी ख्वपय् तयेगु बारे चर्चा परिचर्चा सुरु जुइधुंकूगु दु । अध्ययन समितिं ख्वपयात राजधानी याये जिउ–मजिउ धयागु बारे थःपिनि अध्ययन प्रतिवेदन नं बीधुंकूगु दु ।

ख्वप जिल्ला देसया हे दकलय् चीधंगु जिल्ला खः । शहरी विकास मन्त्रालयं थ्व जिल्लाय् शिक्षा विभाग व शिक्षा कार्यालय तयातःगु सानो थिमि लागायात ३ नम्बर प्रदेशया राजधानी वा मन्त्रालय तयेत पाय्छि खः धकाः प्रतिवेदन न्ह्यब्वःगु दु । प्रतिवेदनं ख्वप जिल्लायात दकलय् योग्य स्थान कथं तायेकूगु कारण मध्ये न्हापा हे थन कृषि विकास बैंकया तालिम केन्द्र बोडेय् निर्माण जुयाच्वंगु कारणं नं खः । उगु थाय्यात ३ नम्बर प्रदेशया संसद भवन दयेकेत योग्य धयातःगु दु । थथे न्हापा हे पूर्वाधार तयार जुयाच्वंगु थाय् जूगु कारणं हे जक प्रतिवेदनय् थ्व थाय्यात प्रदेश राजधानी दयेकल धाःसा अप्वः सनाच्वने म्वाःलिगु खँ दु ।

ख्वप ३ नम्बर क्षेत्रया राजधानी प्रस्ताव जुइवं आपालं मनूत लय्ताःगु नं खनेदु । विशेष रुपं ख्वपयात राजधानी दयेकेमाः धयाच्वंपिं नेकपा एमालेया सांसद् महेश बस्नेत नापं स्थानीय एमाले नेता कार्यकर्तात तसकं लय्ताःगु दु । अथेहे स्थानीय कांग्रेस, माओवादी केन्द्र व मेमेगु राजनीतिक पार्टीत नं उत्साहित हे जूगु दु । उलि जक मखु स्वतन्त्र व थीथी राजनीतिक पार्टीइ आवद्ध जुयाः जग्गा तस्करय् संलग्न जुयाच्वंपिं मनूत झन् थ्व निर्णयं उत्साहित जुयाच्वंगु दु । ह्वात्त हे जग्गाया भाः थहां वनेधुंकूगु कारणं जग्गा दलालत नं सक्रिय जूगु दु । थ्व न्हापा हे आपालं मनूतय्सं अनुमान याःगु नं विषय खः ।

ख्वपया जग्गाया भाः थकयाः थनया जग्गा जमीन पिनेयापिंत मियाः स्थानीय रैथाने नेवाःतय्त आदिबासीं सुकुम्बासीइ परिणत यायेगु ज्या नं थज्याःपिं हे जग्गा तस्करतय्पाखें प्रत्यक्ष रुपं हे जुयाच्वंगु दु । अथे जुयाः हे ख्वपय् हे राजधानी तये हयेमाःगु माग मेमेपिंसं स्वयां नं जग्गा तस्करतय्सं यानाच्वंगु दु । अले थज्याःपिनि हे चंगुलय् लानाः नेतातय्सं नं थज्याःगु हे माग यानाच्वंगु खः धायेत छुं शंका यायेमाःगु खने मदु ।

ख्वप देय्या हे चीधंगु जिल्ला खः । थथे दकलय् चीधंगु जिल्ला जुयाः नं ततःधंगु महत्वाकांक्षी माग यायेगु धइगु माय्बिलिचां त्यप घय्पुइत स्वयेगु थें हे जक खः । धायेत्यनागु खँ ख्वप देय् छगू ल्याखं सांस्कृतिक नगर खः । अझ स्वनिगः हे सांस्कृतिक नगर खः । मल्लकालंनिसें हे थ्व थाय् विश्वय् हे नांजाःगु सांस्कृतिक सम्पदा खः । थज्याःगु अति उच्च स्तरया सम्पदा वा विश्व सम्पदा बचे यायेगु निंतिं मू राजधानी येँयात हे दाङ जिल्लाय् सरे यायेमाः धइगु माग वयाच्वंगु दु । नेपाल मजदूर किसान पार्टीं ला औपचारिक रुपं हे थ्व खँयात ताः ई न्ह्यवंनिसें न्ह्यःने हयाच्वंगु खः । आः प्रदेशया राजधानी नं स्वनिगलं पिने हे तयेमाःगु माग नेमकिपाया दु । चीधंगु जिल्लां तःधंगु महत्वाकांक्षा यायेगु पाय्छि जुइ मखुु ।

थःपिनि क्षमता व योग्यतायात ध्यान तयेमाःगु इलय् थन राजधानी तये हयेगु इलय् पिनेया मनूत झन अप्वः दुहां वइगु स्वाभाविक खः । आः हे थन जनसंख्या अप्वयाः नयेगु, त्वनेगु, लःया समस्या ख्वप जिल्लाया नं तःधंगु समस्या जुया वयेधुंकूगु दु ।

थज्याःगु थीथी कारणं ख्वपयात प्रदेश राजधानी दयेकेगु वा प्रदेशया केन्द्र दयेकेगु भौतिक व साँस्कृतिक ल्याखं मिले हे मजू । थन ला सांस्कृतिक राजधानी वा सांस्कृतिक केन्द्र घोषणा यानाः फुक्कं हे कल कारखाना, भट्टा, उद्योगत पिने यंकेमाःगु खः । विश्वया आपालं देशं वइपिं पर्यटकतय्त निर्वाध रुपं थनया साँस्कृतिक सम्पदा अवलोकन याके बीगु निंतिं बांलाःगु बन्दोबस्त यायेमाःगु खः । उलि जक मखु कि संसारया हे दकलय् उत्कृष्ट सांस्कृतिक धरोहर मध्ये छगू न्यातपौ देगः, लुँया ध्वाखा व ५५ झ्याः दरवार थेंज्याःगु विश्व सम्पदातय्त ल्यंका तयेगु निंतिं नं थन सांस्कृतिक नगर घोषणा याकेगु तयारी ताः ई न्ह्यवंनिसें हे जुयाच्वंगु खः । थथे थीथी तयारी जुयाच्वंगु इलय् हे नगरयात आकाझाकां प्रदेश राजधानी दयेकेगु खँ न्ह्यःने वःगु दु । थज्याःगु इलय् थीथी क्षमता, योग्यता व सुविधायात हे जक ध्यानय् तयाः कमी कमजोरी बारे भ्याः भचा हे ध्यान मतयेगु मिले हे मजू ।

यदि प्रदेश राजधानी ख्वपय् हयेगु जुल धाःसा थन न्हापा स्वयां जनसंख्याः अप्वइ । ख्वप देय् अथें हे जनघनत्व नेपालय् हे दकलय् अप्वः दुगु जिल्ला खः । उकिया नापनापं थन तस्कर, चोरी व भ्रष्टाचारीतय्गु चलखेल नं अप्वइ । उलि जक मखु फोहोर प्रदूषण नं अप्वइ ।

देय्न्यंकं हे प्रदेशया राजधानीया लागिं थीथी कथं आन्दोलन जुयाच्वंगु थ्व इलय् राजनीतिक कारणं जक छुं छगू थाय्यात प्रदेश राजधानी दयेकेगु स्वयां अनया पूर्वाधार तयार जुयाच्वंगु दु मदु धइगु खँय् जक ध्यान बियाः मखुकि प्रदेशय् च्वंपिं सकसियां वयेगु सहजता, उगु जिल्लायात राजधानी जुइगु आवश्यक दु÷मदु, जनताया चाहना दु मदु आदि फुक्कं स्वयाः निर्णय याये मफयेकेमाः ।

सम्बन्धित बुखँ

LEAVE YOUR COMMENTS