ख्वपयात पूर्ण सफाइयुक्त जिल्ला दयेकेत पहल

ख्वप – स्वनिगःया सांस्कृतिक सहर ख्वपयात पूर्ण सरसफाइयुक्त जिल्ला दयेकीगु जूगु दु । ख्वपयात उकथं जिल्ला दयेकेगु निंतिं सरसफाइ सम्बन्धी छगू रणनीतिक कार्ययोजना नं सार्वजनिक याःगु दु । जिल्ला खानेपानी सरसफाइ तथा स्वच्छता समन्वय समिति ख्वपं जिल्लायात पूर्ण सरसफाइयुक्त जिल्ला दयेकेगु ल्याखं ग्वसाः ग्वःगु निन्हुयंकंया छगू कार्यशालां उगु निर्णय याःगु खः ।ज्याझ्वलय् नवासें सांसद महेश बस्नेतं ख्वप जिल्लायात सरसफाइयुक्त दयेकेत थ्व सम्बन्धी रणनीतिक कार्ययोजना कार्यान्वयन यानाः सफल यायेत जिल्लाया प्यंगुलिं नगरपालिकाया महत्वपूर्ण भूमिका दइ धासें जिल्लाया निगू महत्वपूर्ण खुसि हनुमन्ते व मनोहरायात धः मुक्त याये मफुतले ख्वप देय् सफा जुइमखु धयादिल । हनुमन्ते खुसि सफा यायेगु १०० औं हप्ता अभियान शुरु जूगु जानकारी बियादिसें निगुलिं खुसि सफा यानाः करिडोर दयेकेत फत धाःसा अभियानं सार्थकता काइ धयादिल ।

ज्याझ्वलय् प्रदेशसभा सदस्य हरिशरण लामिछाने ब्वनेकुथिनिसें मनूतय्त फोहर वांछ्वयेगुपाखें पनेगु चेतना ब्वलंकेगु व स्थानीय तहं कानुन दयेकाः कारवाही यायेमाःगु खँय् बः बियादिल । जिल्लाया प्रमुख जिल्ला अधिकारी द्रोण पोखरेलं कार्ययोजना सफल यायेत वःगु सुझावयात दुथ्याकाः न्ह्याः वनेगु जुइ धासें योजनाया नीतियात नं हिला यंकेमाः धयादिल ।
अथे हे चाँगुनारायण नगरपालिकाया प्रमुख सोम मिश्र व सूर्यविनायक नगरपालिकाया उपप्रमुख जुना बस्नेतं ख्वपयात येँय्पाखें प्रदूषित यायेगु ज्या जुयाच्वंगु द्वपं बियादिसें नगरपालिकां फोहर याइपिंत कडा कारवाही यायेगु नीति न्ह्यःहे हयागु धयादिल ।

सम्बन्धित बुखँ

LEAVE YOUR COMMENTS