सरकारय् फोरम मथ्यंगुया कारण

संघीय समाजवादी फोरम व राजपा नं सरकारय् वनेत इच्छुक जूसां थ्व निगू दल एमालेया नायः खड्ग ओलीया नेतृत्वय् दुगु सरकारय् वनेगु परिस्थिति तत्काल तापाइगु खःला धइथें च्वन । थ्व सरकारय् दुथ्याकेत संघीय समाजवादी फोरमनाप गहन छलफल जूगु खनेवं राजपाया नेतातय्सं नं सरकारय् वने इच्छुक तर प्रधानमन्त्री नं भाः हे मतः धकाः नुगः मछिंकाच्वनेवं राजपायात नं सरकारय् यंकेत प्रधानमन्त्री व राजपा नायः महन्थ ठाकुर दथुइ जूगु वार्ता सहमति लिक्क थ्यंगु खः । थुकिया निंतिं राजपा व संघीय समाजवादी फोरमं संविधान संशोधनया मुद्दायात एमालें छु छु बुँदाय् धइगु स्वयां नं संशोधनप्रति सकारात्मक जूसा गाः धइगु बटम लाइनय् च्वनाः वार्ता जूगु खः । संशोधनप्रति एमालें नं आवश्यकता व औचित्यताया लिधंसाय् संविधान संशोधन यायेमाःसा यायेका, थ्व संविधान संशोधन हे याये मजिउ धइगु मदु धाल ।

संविधान संशोधन छु छु खँय् यायेगु धइगु न फोरम, न राजपां हे वार्ताय् हल न एमालेया वार्ताकारतय्सं हे छु छु बुँदाय् संशोधन यायेगु धकाः खँ न्ह्यथन । मात्र संशोधन यायेत तयार धइगु लिधंंसाय् फोरम व राजपा सरकारय् वनेत तयार जूगु तर मर्यादाक्रम व छु छु मन्त्रालय दइ धइगु खँय् हे केन्द्रित जुयाः कालबिलया खँय् नं करीब करीब सहमति हे जूगु खनेदत । अले एमालेया नायः ओली नेतृत्वया सरकारय् वनेगु धकाः फोरमं निर्णय नं यात । थुकिया लिधंसाय् सरकार विस्तारया गृहकार्य अन्तिमय् थ्यनेधुंकाः फोरमया भागय् लाःगु मन्त्रालय ल्यंकाः एमाले व माओवादीं मन्त्री जुइपिं क्वःछिनाः सपथ ग्रहणया ई फिक्स जुलं नं फोरमं सरकारय् वनीपिनि नां क्वःछी मफु । थ्व अवस्थाय् संघीय फोरमयात निगू मन्त्रालय ल्यंकाः सरकार विस्तार जुल । फोरमयात निगू मन्त्रालय, निम्ह मन्त्री व राज्यमन्त्री दइगु खँय् नं सहमति कथं मन्त्रिपरिषद् विस्तारय् फोरमया नेता नं दुथ्याइगु चर्चा जूगु खः । तर अन्तय् वयाः फोरम बिना हे सरकार विस्तार जुल । फोरमयात धकाः निगू मन्त्रालय अझ नं प्रधानमन्त्रीं तयातःगु दनि ।

संघीय फोरम मन्त्रिपरिषद् विस्तारय् दुथ्याये मफुगु कारण धाःसा अन दुने सु सु मन्त्री जुइगु धइगु सहमति याके मफुगुलिं हे खः । मन्त्रीया आकांक्षीत यक्व जूगु व फुकसित व्यवस्थापन याये मफइगु अवस्थाय् अन दुने संविधान संशोधनया मुद्दाय् एमाले माओवादीनाप स्पष्ट लिखित सहमति मजुइकं सरकारय् वनेबलय् पार्टीया इमेज स्यनीगु खँ पार्टी दुने पिदनेवं फोरम तत्काल सरकारय् वनीगु अवस्था मंत । मेखे थुज्वःगु हे खं यानाः राजपा दुने नं विवाद खने दत अले राजपाया निर्वाचित सांसद रेशम चौधरीयात टिकापुर घटनाया दोषी कथं शपथ ग्रहण मयाकुसे लुरुलुरु सरकारय् वने मफइगु अवस्थाय् राजपा थ्यनेवं राजपाया च्याप्टर नं तत्कालया निंतिं प्वाःतित ।संविधान जारी जुइवं फोरमया नायः उपेन्द्र यादवं थ्व संविधान ज्या लगे हे मजू धकाः धज्जी उडे याःगु खः । तर फोरमं थःगु मुद्दा त्वःतु त्वःतुं संविधान संशोधनय् सहमति क्यनाच्वंगु छता निता बुँदा जक ल्यंदनि । संविधान स्वीकार हे याये मखु व उगु संविधानया लिधंसाय् जुइगु स्थानीय तहया चुनावय् ब्वति ह काये मखु धकाः अडान कयाच्वंम्ह उपेन्द्र यादव थौं स्वयम् ओली नेतृत्वया हे सरकारय् मन्त्री जू वनेत तुति ल्ह्वनाच्वंगु दु ।

संविधान जारी जुयाः छगू चरणया आन्दोलन नं क्वचायाः थप आन्दोलन न्ह्याके मफइगु धरातलीय यथार्थया कारणं उबलेया छगू केन्द्रीय समितिया मुँज्याय् स्थानीय चुनावय् वनेगु कि मवनेगु धइगु विवाद जुयाच्वंगु इलय् फोरम दुने पहाडया जनजाति व गैरजनजातित स्थानीय चुनावय् वनेमाःगु बिचाःया पक्षय् अले तराइ मधेसया नेतात गुगुं नं हालतय् चुनावय् वने मजिउगु पक्षय् वंगु खः । स्थानीय चुनावय् अशोक राई लगायतया जनजाति, खस क्षेत्री नेतात अझ धाये पूर्व संघीय समाजवादी पार्टीया नेता छखे व पूर्व मधेसी जनअधिकार फोरमया नेतात मेखे लाः वंगु खः । अन्ततः पार्टी स्थानीय चुनावय् वन । न्हापांगु चरणय् पहाडी जिल्लाय् चुनाव जुल । चुनावया पक्षय् दुपिं नेता कार्यकर्तात ब्वति काःगु थासय् पार्टीया पक्षय् खास हे बांलाःगु लिच्वः मवल । निगूगु चरणय् जूगु चुनावय् १ नं. व ५ नं. प्रदेशया तराइ मधेसय् छुं स्थानीय तहलय् पार्टीया पक्षय् मत वल । स्वंगूगु चरणय् २ नं. प्रदेशय् संघीय समाजवादी फोरमया पक्षय् बांलाःगु हे लिच्वः वल । चुनावय् वने हे मजिउ बहिष्कार यायेमाः धाःपिनिगु बाहुल्यता दुगु थासय् बांलाःगु लिच्वः वल तर वनेमाः धाइपिं पहाडी नेतातय् क्षेत्रय् शून्य लिच्वः वल, थुकिया कारण बारे संघीय फोरम दुने सायद हे विश्लेषण जुल जुइ ।

संविधानयात बहिष्कार यायेगु तर्कय् दुपिं फोरम अन्ततः प्रतिनिधिसभा व प्रदेशसभाया चुनावय् ब्वति कयाः प्यंगूगु शक्ति व २ नं. प्रदेशय् न्हापांगु शक्तिया रुपय् स्थापित जुल । चुनाव जःछि एमाले व एमालेया नायः खड्ग ओलीयात कट्टर विरोधी संघीय समाजवादी फोरम चुनाव धुंकाः ओलीनाप बांलाःगु स्वापू तयाः मन्त्रिपरिषदय् तक थ्यंकेगु लागिं तम्तयार जुयाच्वंगु दु । थःगु हे आन्तरिक कारणं लिपांगु मन्त्रिपरिषद् विस्तारय् वने मफुगु सकसिनं सिउ तर उकियात त्वपुयाः अझ नं संविधान संशोधनया बारे सहमति मजूगुलिं धकाः त्वहः तयाच्वने धाःसा ल्वःगु मखु । खय्त ला संघीय फोरम सरकारय् थ्यनेसातकि सत्तापक्षय् स्पष्ट दुई तिहाइ खाइ गुगु संविधान संशोधनया नितिं माःगु मत खः ।

तर संविधान संशोधनया नितिं एमाले–माओवादीं फोरमनाप लिखित हे सम्झौता यानाः फोरमयात सरकारय् दुथ्याकेगु खँय् धाःसा लिखित सहमतिया पक्षय् खने मदयेवं संघीय फोरमयात नं संविधान संशोधनया मुद्दाया सेफ ल्याण्डिङ मजुइकं सरकारय् वनेबलय् थाकुइगु अवस्था खंगु जुइफु । तर लिखित सहमति मजूसां संघीय फोरम सरकारय् वनाः संविधान संशोधनया सवालय् कार्यदल मार्पmत ज्या यायेगु रणनीति उपयुक्त जुइगु खः । छगू हे सरकारय् च्वने धुंकाः एमाले–माओवादी नेतृत्वयात संविधान संशोधनया निंतिं अझ अप्वः विश्वास काये फइगु वातावरण जुइ । न्हापा थें ओलीयात आलोचना यानाः एमालेयात ब्वः बियाः थःगु पसः चले याये फइगु अवस्था आः मदु । केन्द्र सरकारनाप बांलाःगु सम्बन्ध तयावने मफुत धाःसा प्रदेश दुईलय् सरकारया नेतृत्व यानाच्वंगु दल संघीय फोरम असफल जुइगु खँय् नं ध्यान बीमाःगु खनेदु ।

सम्बन्धित बुखँ

LEAVE YOUR COMMENTS