विदेशं हइगु चिनीया भन्सार थकायेत माग

येँ – विदेशी चिनी आयातं नेपालय् उत्पादन जूगु चिनीं बजाः काये फइ मखु धासें चिनी उत्पादक कम्पनीतय्सं सरकारयात विदेशं आयात जुइगु चिनीइ भन्सार अप्वयेकेत दबाब बियाच्वंगु दु । चिनीइ आः कयाच्वंगु १५ प्रतिशत भन्सार अप्वयेकाः ५० प्रतिशत थ्यंकेमाःगु माग उमिसं यानाच्वंगु दु । मेखे विदेशं चिनी आयात यानाच्वंपिं व्यापारीतय्सं धाःसा भन्सार मूल्यांकन पुनरावलोकन यायेत माग यानाच्वंगु दु । नेपाःया व्यापारीतय्सं थौंकन्हय् पाकिस्तानं चिनी झिके यानाच्वंगु दु । अन चिनी प्रतिकिलो १० निसें १५ तका भारुं लाः धासें सरकारं न्हापा यानातःगु भन्सार मूल्यांकन पाय्छि मजूगु खँ उमिसं धयाच्वंगु खः ।