नेपाःमियात बीमाया रकम कम जक

येँ – वंगु वालय् येँय् जूगु बंगलादेशी विमान दुर्घटनाय् लानाः सीपिं यात्रुतय्सं मेपिंसं स्वयां कम जक क्षतिपूर्ति बीमापाखें काये खनीगु खँ सम्बद्ध विज्ञतय्सं धया हःगु दु । नेपालं बीमा सम्बन्धी अन्तर्राष्ट्रिय सम्झौताय् इलय् हे हस्ताक्षर याना मतःगु कारणं यानाः थ्व समस्या वयेत्यंगु खँ नं धाःगु दु । थ्व छगू सन्धिइं नेपालं हस्ताक्षरयाना मतःगु कारणं यानाः यूएस–बांग्ला विमान दुर्घटनाय् लानाः सीपिं यात्रुतय्सं मेमेगु विमान दुर्घटनाय् लानाः सीपिं यात्रुतय्सं सिबें कबिर ३५ लाख तका दां म्हो जक काये खनीगु अनुमान यूएस–बांग्ला विमानया नेपाः प्रतिनिधिं धाःगु दु । विमान दुर्घटनाय् दइगु बीमा सम्बन्धी मोन्ट्रियल सम्झौताय् नेपालं हस्ताक्षर मयाःगु कारणं नेपाःया मृतकया परिवारं म्हो जक ध्यबा काये खनेत्यंगु खः ।

थ्व सन्धिइ हस्ताक्षर याना तःगु जूसां नेपाःया मृतकया परिवारं ५५ हजार डलर स्वयां अप्वः क्षतिपूर्ति काये खनीगु खः । तर उकी हस्ताक्षर याना मतःगु कारणं २० हजार ति जक क्षतिपूर्ति काये खनीगु अनुमान जुयाच्वंगु दु । विमान दुर्घटना जुइधुंकाः यूएस बांग्ला विमानं बीमा यानातःगु कम्पनीया प्रतिनिधि नेपाः वयाः दुर्घटनाया अनुसन्धान यायेधुंकूगु दु । मोन्ट्रियल अन्तर्राष्ट्रिय महासन्धि सन् १९९९ य् तयार जुयाच्वंगु खः । तर उकी नेपालं आः तक हस्ताक्षर मयाःनि । थ्व दुर्घटना लिपा नेपालं हस्ताक्षरया तयारी न्ह्याकूगु खँ उडड्यन मन्त्रालय सूत्रं धाःगु दु ।

सम्बन्धित बुखँ

LEAVE YOUR COMMENTS