खस आर्य आरक्षण विवाद, थुकित चीकेमाःगु ईयूया सुझावयात खस नेतातय् विरोध

येँ – युरोपियन युनियनं नेपालय् खस आर्ययात समेत बियातःगु आरक्षणयात चीकेमाः धकाः बिउगु सुझावयात थीथी पार्टीइं च्वंपिं खस आर्य नेतातय्सं विरोध याःगु दु । निर्वाचन पर्यवेक्षणया लागिं नेपाः वःगु युरोपियन युनियनया निर्वाचन पर्यवेक्षण मिशनं आरक्षणय समावेश यानातःपिं खस आर्ययात चीकेमाः धकाः सुझाव बिउगु खः । उगु मिशनया प्रमुख जेल्याना जोभ्कों म्हीग छगू पत्रकार सम्मेलन यासें मेमेगु सुझावया लिसें थ्व सुझाव नं बिउगु खः । ईयूया थ्व सुझाव सार्वजनिक जुइवं म्हिगः हे पुलांम्ह प्रधानमन्त्री लिसें नयाँ शक्ति पार्टीया अध्यक्ष डा. बाबुराम भट्टराईनं ट्विटर मार्फत ईयूपाखें थज्याःगु ‘उर्दी’ जारी जुइगु आपत्तिजनक जुल धकाः विरोध यानादीगु दु । वय्कलं नेपाःया संविधानय् गनं नं आरक्षण धइगु खँग्वः तकं मदुगु खँ नं धयादीगु दु ।

उकथं हे एमालेया सचिव लिसें सांसद योगेश भट्टराईनं नं ट्विट यासें ईयूया थ्व निष्कर्ष दुर्भाग्यपूर्ण खः धासें ईयूयात थ्व लिच्वः लित कायेत इनाप यानादीगु दु । वय्कलं थुकिं यानाः ईयूया निष्कर्ष प्रति हे शंका जुइगु खँ नं कनादीगु दु । उकथं हे राप्रपाया अध्यक्ष कमल थापां नं ट्विट मार्फत नेपाःया संविधानय् यानातःगु व्यवस्था खारेज या धकाः ईयूपाखें सुझाव वइगु धइगु हस्तक्षेपकारी ज्या खः धकाः आलोचना यानादीगु दु ।

सम्बन्धित बुखँ

LEAVE YOUR COMMENTS