विश्वकप २०१८

माथिल्लो तामाकोशीया लागत ६० अर्ब

येँ –  माथिल्लो तामाकोशी जलविद्युत आयोजनाया लागत थहां वनाः ६० अर्ब थ्यनीगु अनुमान याःगु दु । तःभुखाय्, नाकाबन्दी व अमेरिकी डलरया भाः थहां वंगुलिं यानाः आयोजनाया लागत नं थहां वंगु खँ धाःगु दु । अथेहे आयोजना दयेकेगु ई दुने पुलेमाःगु ब्याजयात पुँजीकरण याःगुलिं यानाः नं लागत अप्वःगु खँ धाःगु दु । भुखाय् व नाकाबन्दीया हुनिं दत्या तक आयोजनाया ज्या प्रभावित जूगु खः । आयोजना शुरु याःगु इलय् ४१ अर्ब ६७ करोड तका तुइगु अनुमान याःगु खः । अथेहे निर्माण शुरु याःगु इलय् डलरया भाः प्रति डलर ८० तका थ्यनाच्वंगु खःसा आः प्रतिडलर १०४ निसें ११० तका कारोबार जुयाच्वंगु दु । डलरया भाः थहां वनाः नं आयोजनाया लागत अप्वःगु खः । आयोजना दयेकेगु ज्याय् आः तक ३६ अर्ब खर्च जुइधुंकूगु दु ।

आयोजनाया ९४ प्रतिशत ज्या क्वचायेधुंकूगु दु । आयोजना क्वचायेकेगु निंतिं ६ प्रतिशत जक ज्या ल्यं दनिगु खँ धाःगु दु । आयोजनाया कथं वइगु मंसिरं निसें आयोजनाया न्हापांगु युनिटं मत उत्पादन यायेगु ज्या शुरु याइ । मंसिरं न्यागू युनिट मध्ये छगू युनिटं जक ७६ मेगावाट मत उत्पादन यायेगु आज्जु तयातःगु दु ।अथेहे २०७५ साल दुने दयेकेगु ज्या क्वचायेवं फुक्कं युनिटं मत उत्पादन यायेगु तयारी जुयाच्वंगु दु । आयोजनां ४५६ मेगावाट मत उत्पादन याइगु खँ धाःगु दु । थौंकन्हय् आयोजनाया मुहान, बाँध, सुरुङ प्रसारण लाइन व इलेक्ट्रो मेकानिकल व हाइड्रो मेकानिकल यानाः प्यंगू लटया ज्या जुयाच्वंगु दु । अथेहे प्रसारण लाइन अन्तर्गतया प्यंगू टावरया संरचना दयेकेगु ज्या ल्यं दनि । आयोजनापाखें उत्पादन जुइगु मत २२० केभी क्षमताया प्रसारण लाइनपाखें न्यूखिम्ति स्वाइगु खँ धाःगु दु ।

अथेहे निजी क्षेत्रं न्ह्याकाच्वंगु सिन्धुपाल्चोकया चाकु ‘ए’ जलविद्युत आयोजनाया ज्या नं ९५ प्रतिशत क्वःचाःगु खँ धाःगु दु । निजी क्षेत्रया शिवश्री हाइड्रोपावरं उगु आयोजना दयेकाच्वंगु खः । आयोजना वइगु वैशाख लिपांगु इलय् तक क्वचाइगु खँ आयोजनाया निर्देशक उमेश कसजुं कनादीगु दु । आयोजना २२.१ मेगावाट क्षमताया खः । थुगु आयोजनाया नं लागत अप्वःया प्यंगू अर्ब तक थ्यंगु दु । न्हापा आयोजना दयेकूगु इलय् ३ अर्ब तक तुइगु अनुमान यानातःगु खःसां २०७१ सालय् जुरेय् चलः वःगुया लिसें भुखाय् व नाकाबन्दीं यानाः नं लागत अप्वःगु खँ धाःगु दु । अथेहे २०७३ सालय् भोटेकोशी खुसिबाः वयाः नं आयोजना दयेकेगुलिइ लिच्वः लाकूगुलिं यानाः नं आयोजना दयेकेगु ज्या लिबाःगु खः । आयोजनाया मत लामोसाँघुइ च्वंगु सव स्टेशनया २२ किमी प्रसारण लाइनपाखें केन्द्रीय प्रसारण लाइनाय् स्वाइगु खँ धाःगु दु । अथेहे कम्पनीं जिल्लाया अपर बलेफी आयोजना दयेकेगु ज्यायात नं तीव्रता बिउगु दु । ३६ मेगावाटया अपर बलेफी दयेकेगु निंतिं ६ अर्ब तका तुइगु अनुमान याःगु दु ।

सम्बन्धित बुखँ

LEAVE YOUR COMMENTS