पदमुक्त जुइधुंकाः नं पराजुलीया विवाद !

येँ – पुलांम्ह प्रधानन्यायाधीश गोपालप्रसाद पराजुलीं राजीनामा बीधुंकाः आः वय्कःया अवकाश मिति गबले जुइ धइगु न्हूगु विवाद पिहां वःगु दु । थ्व स्वयां न्ह्यः वय्कःया जन्म मितिया विवाद जुयाच्वंगु खः । थ्वहे जन्म मितिया विवादं यानाः वय्कःयात न्याय परिषद् सचिवालयं वय्कःया सेवा अवधि न्हापा हे क्वचायेधुंकल धकाः पदमुक्त जूगु पौ बिउगु खः ।
वयां लिपा वय्कलं राष्ट्रपति विद्यादेवी भण्डारी समक्ष राजीनामा बियादीगु खः । राष्ट्रपति भण्डारीं वय्कःया राजीनामा स्वीकृत यासें हानं न्याय परिषद्तय् तुं छ्वया बिउगु खः । थुकिं यानाः वय्कःया अवकास मिति आः गुकियात कायम यायेगु धइगु विवाद पिहां वःगु खः । न्याय परिषदं वय्कःयात पदमुक्त जुल धकाः पौ च्वःगु मितियात कायम यायेगु खःलाकि राष्ट्रपतिं राजीनामा स्वीकृत याःगु मितियात कायम यायेगु खः धइगु विवाद पिहां वःगु खः ।

न्याय परिषदं वय्कःयात न्हापा हे पदमुक्त यायेधुंकूगु खःसां राष्ट्रपतिं लिपा हानं पराजुलीया राजीनामा स्वीकृत यानादीगुलिं न्याय परिषदं न्हापा याःगु पदमुक्तिया निर्णय स्वतः खारेज जूगु तर्क नं कानूनविद्तय्सं तया हःगु दु । राष्ट्रपतिं पराजुलीया राजीनामा स्वीकृत यानाः पुनः न्याय परिषद्यात हे छ्वया हःगुलिं परिषदं थम्हं न्हापा याःगु निर्णय समेत सच्चे यानाः पराजुलीया अवकास मिति कायम याये मालीगु अवस्था वःगु खँ धाःगु दु । थ्वहे झ्वलय् पदमुक्त जूम्ह पुलांम्ह प्रधानन्यायाधीश पराजुलीं छगू टेलिभिजनयात अन्तर्वार्ता बीगु झ्वलय् राष्ट्रपति भण्डारीं थःगु राजीनामायात सुभाय् सहित ‘स्वीकृत यानाबिज्याःगु’ धकाः न्ववानादीगु खँ नं थन चर्चाया विषय जुयाच्वंगु दु ।

सम्बन्धित बुखँ

LEAVE YOUR COMMENTS