अवकाश योजना लागू मजुइगु

येँ – पुलांम्ह प्रधानमन्त्री शेरबहादुर देउवाया पालय् हःगु स्वैच्छिक अवकाश योजना लागू मजुइगु जूगु दु । संघीय मामिला तथा सामान्य प्रशासन मन्त्री लालबाबु पण्डितं बिबिसीयात अन्तर्वार्ता बीगु झ्वलय् उगु खँ धयादीगु खः । ‘आः दुपिं कर्मचारीयात स्वैच्छिक अवकाश बिलधाःसा छखे सरकारयात ३० अर्ब तकाया आर्थिक भार लाइसा मेखे सरकारी सेवा बीत दक्ष व सक्षम कर्मचारी म्हो जुयाः जनताया ज्या यायेफइमखु । उकि थ्व योजना लागू यायेफइमखु’ वय्कलं कनादीगु दु ।

वय्कलं धयादिल, ‘स्वैच्छिक अवकास योजना निगू कारणं लागू जुइ फइमखु । न्हापांगु कारण अवकाश जुइत निवेदन बिउपिं मध्ये गुम्हेसियां नियमित अवकाशया ई हे छवाः ल्यंदनिसा गुम्हेसियां १५÷२० न्हु जक ल्यं दनि । तर वय्कःपिंसं राज्यपाखें अप्व सुविधा कायेगु निंतिं स्वैच्छिक अवकाशया निवेदन बिउगु दु । थ्व नितान्त गलत खँ खः । निगुगू गुम्ह सक्षम, दक्ष व राज्यया निंतिं माःपिं खः, केन्द्र सरकार, प्रदेश सरकार व स्थानीय तहलय् उमिगु आवश्यकता दु, उमित बिदा बीगु व न्हूपिं कर्मचारी हयाः प्रशिक्षित यायेगु थाकूगु व ई काइगु ज्या खः । आःया अवस्थाय् थज्याःगु ज्या यायेफइमखु । थज्याःगु यात धाःसा जनतायात सेवा बीत थाकुइ । अथे जुयाः उमित जिमिसं बिदा बीफइमखु ।’

वय्कलं शारीरिक रुपं व मानसिक रुपं ज्या यायेमफुपिंसं धाःसा स्वैच्छिक अवकाश कायेफइगु खँ नं कनादीगु दु । मानसिक रुपं जागिर त्वःते चाहे जूपिं व ज्या यायेमखु धाइपिंसं राजीनामा यानाः वंसां जिउगु खँ कनादिसें वय्कलं धयादिल, ‘जिं राजीनामा यायेमखु, राज्यं जितः अप्वः लगानी यानाः बिदा बिउसां जिउ धायेगु खःसा थ्व असम्भव खः । असम्भव लँपुइ सरकार वनीमखु ।’ वय्कलं पुलांगु सरकारं हःगु स्वैच्छिक अवकास योजना संशोधन जुइगु खँ कनादिसें धयादिल, ‘नियमित रुपं अवकाश जुइत्यंपिं, म्हो ई जक जागिर नयेगु ई ल्यं दनिपिंसं स्वैच्छिक अवकाश कायेदइमखु । पुलांगु व्यवस्था संशोधन जुइ ।’

थौंकन्हय् प्यम्ह सचिव सहित झिद्वः कर्मचारीपिंसं स्वैच्छिक अवकाशया निंतिं संघीय मामिला तथा सामान्य प्रशासन मन्त्रालय निवेदन बियातःगु दु । देउवा सरकारं निजामतिसहित संसद व स्वास्थ्य सेवाया कर्मचारीतय् निंतिं स्वैच्छिक अवकाशया योजना हःगु खः । मन्त्रालयं ५० दँ उमेर थ्यंपिं व २० दँ सेवा अवधि पूवंकाः निवृत्तिभरण कायेदइगु अवस्थाय् थ्यंपिं कर्मचारीं अवकाश कायेदइगु व्यवस्था याःगु खः ।

सम्बन्धित बुखँ

LEAVE YOUR COMMENTS