विश्वकप २०१८

पूर्व पश्चिम रेलमार्ग ९४५ किलोमिटरया जुइगु

येँ (रासस)- चितवन राष्ट्रिय निकुञ्ज छले यानाः पूर्व–पश्चिम रेलमार्ग दयेकेगु बारे सम्भाव्यता अध्ययन याःगु दु । थ्व स्वयां न्ह्यः निकुञ्ज जुयाः रेलमार्ग यंकेगु कथं अध्ययन याःगुलिं वन मन्त्रालयं विकल्प मालेत इनाप याःगु खः ।

रेल विभागया वरिष्ठ इञ्जिनियर प्रकाश उपाध्यायया कथं लिपांगु सम्भाव्यता अध्ययन कथं निकुञ्ज छले यायेगु निंतिं चितवनया सौराहा व टाँडी दथुइ बीस हजारी तालया दक्षिणपाखे व भरतपुर विमानस्थलया पश्चिमपाखें रेलमार्ग दयेकेगु जूगु दु ।

थ्व स्वयां न्हापा याःगु सम्भाव्यता अध्ययनं पर्साया ठोरी जुयाः चितवनया माडीपाखें निकुञ्ज पार यानाः गोलाघाटं नवलपरासी पाखे वनीगु कथं डिजाइन
याःगु खः ।

विश्व सम्पदा सुचीइ लाःगु निकुञ्ज जुयाः रेल सञ्चालन जुलधाःसा वन्यजन्तु संरक्षण याये थाकुइगु धासें संरक्षणकर्मी व वन मन्त्रालयं विकल्प मालेमाःगु अडान कयाः वयाच्वंगु खः । विश्व सम्पदा सुचीइ लाःगु क्षेत्रय् पूर्वाधार दयेकेबलय् युनेस्कोपाखें अनुमति कायेमाःगुलिं यानाः नं मेगु विकल्प माःगु खः ।
उगु क्षेत्रपाखें रेलमार्ग दयेकेगु कथं रुट सर्भे क्वचाःगुलिं आः विस्तृत परियोजना प्रतिवेदन (डीपीआर) या प्रक्रिया न्ह्यःने न्ह्याकेगु तयारी जुयाच्वंगु खँ उपाध्यायं कनादिल । वय्कःया कथं वइगु आर्थिक दँय् डिपीआरया ज्या क्वचायेकाः ठेक्का प्रक्रियाय् वनेगु जुइ ।

पूर्व पश्चिम रेलमार्ग ९४५ किलोमिटरया जुइगु खँ कनादिसें उपाध्यायं चुरे पहाडय् धाःसा सुरुङ मार्ग दयेकेगु जानकारी बियादिल । वय्कःया कथं भालुवाङ, दाउन्ने व पथलैयाय् सुरुङ मार्ग जुइ । गुकी मध्ये १६ किलोमिटरया भालुवाङ खण्डया सुरुङ मार्गयात १० बाइ १२ किलोमिटरय् क्वकायेगु कुतः जुयाच्वंगु दु ।
सरकारं पूर्व–पश्चिम रेलमार्गया मूल रुटयात ९ खण्डय् विभाजन याःगु दु । मूल खण्ड ९४५ किलोमिटर जूसां नं पोखरा–येँ, येँ–वीरगञ्ज सहायक रेलमार्गयात स्वायेगु खःसा १ हजार ३७६ किलोमिटर जुइ । नवलपरासीया चोरमारा निसें बुटवल तकया डीपीआर तयार जुइधुंकूगु खँ नं इञ्जिनियर उपाध्यायं कनादीगु दु ।

सम्बन्धित बुखँ

LEAVE YOUR COMMENTS