ब्लोदानया रजतजयन्ती नापं स्वक्वःगु राष्ट्रिय रक्तदाता दिवस हन

येँ- नेपाःया राष्ट्रिय रक्त कार्यक्रम व स्वयमसेवी हिदान क्षेत्रय् सक्रिय भूमिका म्हिता वयाच्वंगु ब्लड डोनर्स एशोसियसन नेपाल (ब्लोदान)या रजतजयन्ती नापं स्वक्वःगु राष्ट्रिय रक्तदाता दिवस–२०७४ छगू ज्याझ्वःया दथुइ हन । नेपाःया न्हापांम्ह हिदाता मदुम्ह दयावीरसिंह कंसाकारप्रति समर्पित यासें उगु ज्याझ्वः जूगु खः ।

‘विना शोधभर्ना विरामीयात हि उपलब्ध याकेत स्वयमसेवी हिदान अभियानय् सहभागि जुइनु’ धइगु नारा बियाःजूगु ज्याझ्वः ब्लोदानया केन्द्रीय उपाध्यक्ष रमेशध्वज बस्नेतया सभापतित्वय् जूगु खः ।

ज्याझ्वलय् मूपाहांकथं झायादीम्ह येँ महानगरपालिकाया प्रमखु विद्यासुन्दर शाक्यं व्यक्तिगत रुपं व संस्थागत रुपं अभिव्यक्त याःगु भावना व नालेबहगु सुझावयात येँ महानगरपालिकां कार्यान्वयन यायेगु जुइ धासें सकल हिदातातय्त उत्साहित व प्रेरित यायेगु ज्याय् सहकार्य यायेत तयार दु धयादिल ।

ज्याझ्वलय् विशेष पाहांकथं झायादीम्ह केन्द्रीय रक्तसंचार सेवा, नेपाल रेडक्रस सोसाइटीया निर्देशक डा. मनिता राजकर्णिकारं नेपाःया रक्तसंचार ज्याय् शतप्रतिशत स्वयमसेवी हिदातापाखें हि संकलन यायेगु ज्याय् ब्लोदानं म्हिता वयाच्वंगु भूमिका च्वछायेबहजू धासें थज्याःगु ज्यायात निरन्तर न्ह्याका वनाच्वनेमाःगु खँय् बः बियादिल । छक्वलं तःधंगु मात्राय् हिदान यायेगु स्वयां नियमित रुपं हिदान ज्याझ्वः संचालन यानाच्वने फत धाःसा हिया मागकथं पूर्ति यायेत सहज जुइगु वय्कःया धापू दु ।

ज्याझ्वलय् वरिष्ठ कलाकार सन्तोष पन्त, ब्लोदानया संस्थापक नापं वरिष्ठ सल्लाहकार सूर्यकुमारी श्रेष्ठ, नेपाल हेमोफेलिया सोसाइटीया उपाध्यक्ष उज्वल केसी, नेपाल थालिसिमिया सोसाइटीया सचिव कमलनाथ उप्रेति, ब्लोदानया केन्द्रीय महासचिव ई. सानुबाबु प्रजापतिपिंसं सरकारं हिदातातय्गु स्वास्थ्य बीमा यायेमाःगु, सरकारं विना शोधभर्ना विरामीयात निःशुल्क हि वितरण यायेगु प्रक्रियायात याकनं कार्यान्वयनय् हयेमाःगु विचाः तयादीगु खः ।

ज्याझ्वलय् ब्लोदानया संस्थापक, निवर्तमान अध्यक्ष नापं प्यंगू कार्यकाल तक कार्यसमितिइ च्वनाः सेवा यानादीपिं पुलांपिं पदाधिकारी व दुजःपिंत हनेज्या नं याःगु खः । अथे हे नीदँ निसें संस्थालिसे आवद्ध जुयाः हिदान ज्या याना वयाच्वंगु संघसंस्था, ताःईतक विशेष ग्वाहालि यानादीपिं, स्वयमसेवी हिदानय् विशेष भूमिका म्हितूगु संस्था, ब्लोदानया जिल्ला शाखा व क्षेत्रयात कदरपत्र लःल्हायेगु नापं संस्थाया ‘ब्लड फन्ड’य् ग्वाहालि यानादीपिंत मतिनाया चिं नं लःल्हाःगु खः ।

सम्बन्धित बुखँ

LEAVE YOUR COMMENTS