रेशम चौधरीयात त्वःतकेत येँय् थारूतय् ज्याझ्वः

येँ -सांसद लिसें थारू आन्दोलनया न्ह्यलुवा रेशम चौधरीयात सांसद पदया शपथ ग्रहण तकं मयासे कुनातःगु विरोधय् थारूतय्सं राजधानी येँय् थीथी कथंया विरोध ज्याझ्वः यायेगु तयारी यानाच्वंगु दु ।

चौधरीयात तत्काल त्वःतेमाः धइगु माग यासें थारू आन्दोलनकारीतय्सं वंगु छुं ई न्ह्यः येँया माइतिघर मण्डलाय् प्रदर्शन याःगु खःसा लिपा येँय् छगू मशाल जुलुस नं पिकायेधुंकूगु दु । थनया शान्तिनगरय् उमिसं मशाल जुलुस पिकाःगु खः ।

चौधरीं जेलय् च्वनाः शुरु याःगु आमरण अनसन गृहमन्त्री रामबहादुर थापां जुस त्वंकाः तोडे याकूसां चौधरीयात त्वःतेमाः धकाः जुयाच्वंगु आन्दोलन धाःसा दिउगु मदुनि । प्रहरीं मालाच्वंम्ह मेम्ह सांसद नवराज सिलवालयात शपथ ग्रहण याकाः चौधरीयात कुनातःगु खँय् थारू समुदाय तम्वयाच्वंगु दु ।