ब्रेस्ट क्यान्सर : भ्रम व यथार्थ

थौंकन्हय् नेपाःयापिं मिसातय्त नं ब्रेस्ट क्यान्सर जुइगु समस्या अप्वया वयाच्वंगु दु । इलय् हे सचेत मजुइगु कारणं यानाः ल्वय् म्हसीके लिबाइगु व उकिं ज्यान हे खतरा जुइगु नं जुयाच्वंगु दु । तर थुकिया लिसेलिसें थ्व ल्वय्या बारे यक्व हे भ्रम नं न्यना वनाच्वंगु दु । झासँ, थौं थन अज्याःगु हे छुं छुं भ्रम व वास्तविकता बारे चर्चा याये ।

१) स्वस्थ जीवनशैलीं ब्रेस्ट क्यान्सर मजुइकेत ग्वाहालि याइ
तथ्य ः थ्व धारणा यक्व हद तक पाय्छि जू । अथे ला थ्व ल्वय्या तःता हे कारण दु । तर मिनोपज लिपा मिसातय्गु म्हय् दाः खानावइ, गुकियात ब्रेस्ट क्यान्सरया निंतिं खास जिम्मेवार भाःपियातःगु दु । उकिं सन्तुलित नसात्वँसा नयेत्वने यायेगु, अय्लाः चुरोट मत्वनेगु, नियमित रुपं व्यायाम यायेगु, मर्निङ वाक वनेगु थेंज्याःगु बानिं यानाः ब्रेस्ट क्यान्सरयात छुं हद तक पनेफु । अथे खःसां गुलिं गुलिं मिसातय्त थ्व दक्व नियम पालना यानाच्वंसां ब्रेस्ट क्यान्सर जुइफु । अथे जूगुलिं छुं लक्षण खनेदत धायेवं हे डाक्टरलिसे अवश्य सल्हा यानादिसँ ।

२) टाइट ब्रा फितकि ब्रेस्ट क्यान्सर जुइगु खतरा दइ
तथ्य ः थ्व धारणा भ्रामक खः । वैज्ञानिक दृष्टिं ब्राया डिजाइन वा बनावटया क्यान्सरलिसे छुं हे स्वापू मदु ।

३) वंशानुगत थुकिया मू कारण खः
तथ्य ः ब्रेस्ट क्यान्सर जूपिं थ्यंमथ्य १० प्रतिशत मिसातय्के दुगु विशेष कथंया जीन थुकिया जिम्मेवार जूगु लूगु दु, गुगु छगू हे परिवारया जःपिनि दथुइ थुकियात वंशानुगत ढंगं न्ह्यज्याकाः न्यंका वनाच्वंगु खः । यद्यपि थुगु ल्वय् जूपिं ७५ प्रतिशत मिसातय्गु फेमिली हिस्ट्रिइ थुकिया गुगुं दसु जूगु मदु । धयागुया तात्पर्य छु धाःसा यदि सुं मिसाया परिवारय् हे सुयातं थ्व ल्वय् न्हापा जूगु दुसा सावधानीया निंतिं ४० दँया उमेर लिपा वं मेमोग्राफि याकेमाः, तर मां व मांयापाखेंया अजि वा चांयात थ्व ल्वय् दुसा मेगु पुस्ताया म्ह्याय्मस्तय्त नं थुकिया लक्षण खने दयेमाः धयागु जरुरी मदु ।

४) ह्याउँमचायात मामं दुरु मत्वंकल धाःसा ब्रेस्ट क्यान्सरया आशंका दइ
तथ्य ः थ्व यक्व हद तक खःगु खँ खः । उपचारया निंतिं वइपिं मिसातय्गु केस हिस्ट्रीया आंकडा स्वयेधुंकाः थथे धाये फइ कि ब्रेस्ट क्यान्सरया ल्वगितय् दथुइ अज्याःपिं मिसातय् ल्याः अप्वः दु, गुमिसं छुं कारणं थः ह्याउँमचायात थःगु दुरु मत्वंकूगु जुयाच्वन । थुकिया मू कारण थ्व खः कि मचायात दुरु मत्वंकूगुलिं यानाः मेमोरी ग्लायण्डय् जुइगु सिक्रीसन म्हं पिहां वनेफइमखु, गुगु लिपा वनाः क्यान्सरगुलिइ हिलावनेफु । यद्यपि दुरु मत्वंकूपिं दक्व मिसातय्त थज्याःगु समस्या वइ हे धकाः धायेमफु । अय्नं इमित क्यान्सर जुइगु सम्भावना धाःसा अप्वः हे दइ ।

५) रेडियोथेरापीया माध्यमं प्रभावित ब्वयात छुं अंश जक मदयेका छ्वयेगु स्वयां दुरुपा छपां हे ध्यनाछ्वत धाःसा ल्वय् पूवंक लनावनी ।
तथ्य ः ब्रेस्ट कन्जर्भेसन सर्जरी (लम्पेक्टोमी)पाखें क्यान्सर प्रभावित ब्वयात लिकयाछ्वयेगु नं पूवंक हे सुरक्षित जू । थुकिया निंतिं दुरुपा छपातं ध्यना छ्वयाच्वनेम्वाः । तर क्यान्सरया गुलिचा भचा अप्वः हे तगुलि दुसा अथे याये मालेफु ।

६) मेमोग्राफी टेस्टं हानिकारक रेडिएसन पिहां वइ, गुकिं ब्रेस्ट क्यान्सरया खतरा अप्वयेकी
तथ्य ः थ्व सत्य खः कि मेमोग्राफिया झ्वलय् रेडिएसनया एक्सपोजर जुइ, तर थुकिया मात्रा तसकं कम जुइ, गुकिं क्यान्सरया गुगुं आशंका दइमखु ।

७) नियमित जाँच व मेमोग्राफिं बे्रस्ट क्यान्सर मजुइकेत ग्वाहालि याइ
तथ्य ः सेल्फ ब्रेस्ट एग्जामिनेसन व मेमोग्राफीं सुरुवाती अवस्थाय् ल्वय्यात म्हसीकीगु जूगुलिं उपचार यायेत अःपुकाबी, तर थुकिं ब्रेस्ट क्यान्सर विकसित जुइगु प्रक्रियायात पने फइमखु ।

८) जाँच लिपा गुपिं मिसातय्के थुगु ल्वय्या आशंका दइगु खः, वयागु निंतिं थुगु खतरायात पनेगु सम्भव दइमखु
तथ्य ः खँ अथे मखु । स्वस्थ जीवनशैली नालाः थुकिया आशंकायात कम यायेफइ । मालावन धाःसा डाक्टरं प्रोफाइलेटिक बाइलेटरल मोस्टेकमिज नांगु उपचारया सल्हा बी ।

९) ट्युमरया बायोप्सी अथवा सर्जरी लिपा ल्वय् अप्वः चर्को जुइ
तथ्य ः थ्व धारणा एकदम गलत खः, अले थुकिया छुं वैज्ञानिक आधार नं मदु । झीसं थ्व थुइकेगु कुतः यायेमाः कि गुगुं गुलिया बायोप्सी काये धुंकाः व तीव्र गति विकसित जुइगु आक्रामक ट्यूमर जुइ फइमखु । थुकथं हे यदि सर्जरीया झ्वलय् ट्यूमर पूवंक हे लिकयाबिल धाःसा थुगु ल्वय् लंकेत ग्वाहालि जुइ अले थुकिया मेगु उपाय नं मदु ।

१०) थुकिया निंतिं वैकल्पिक उपचार यायेगु बेस
तथ्य ः वैकल्पिक चिकित्सा पद्धतिया गुगुं क्वातुगु वैज्ञानिक आधार दइमखु । अथे जूगुलिं क्यान्सर थेंज्याःगु गम्भीर ल्वय्या उपचारया निंतिं वैकल्पिक उपचार नालेगु सल्हा बीफइमखु । सर्जरी बाहेक रेडियो व किमोथेरापी हे क्यान्सरया छता जक उपचार खः ।

११) ब्रेस्ट ट्रान्सप्लान्टं क्यान्सरया जोखिम अप्वयेकी
तथ्य ः थ्व खँ पूवंक सत्य मखु । आतकया अध्ययनं ला थ्व हे धाइ कि ब्रेस्ट ट्रान्सप्लान्ट (दुरुपाया प्रत्यारोपण) या क्यान्सरया जोखिम अप्वइगुलिइ छुं हे स्वापू मदु । यद्यपिं थुकिं यानाः लिपा ब्रेस्ट क्यान्सरं पीडित मिसायात हाकनं मेमोग्राफि व फलोअप जाँचय् असुविधा जुइफु । अज्याःबलय् क्यान्सर पत्ता लगे यायेत थप जाँच यायेमाःगु जुइ ।

१२) ब्रेस्टय् गुगुं कथंया चोट लात धाःसा भविष्यय् क्यान्सर जुइफु
तथ्य ः दुरुपाय् चोट वा आघात लायेवं क्यान्सर जुइ धयागु छुं दसि मदु । चोट लायेधुंकाः क्यान्सरया लक्षण खनेदइगु धयागु छगू संयोग हे जक जुइ ।

१३) दुरुपाय् गुलिचा वइगु क्यान्सरया दसि खः
तथ्य ः थ्व धारणा गलत खः । दुरुपाय् दयावइगु गुलिचा मध्ये ८० प्रतिशत क्यान्सर गुलि जुयाच्वनीमखु । थज्याःगु गुलिचा उमेर थहां वंलिसे म्हय् जुइगु हार्मोन सम्बन्धि परिवर्तनया कारणं दयावइगु खः । गुकिं दुरुपाय् फायब्रोसिस्टिक परिवर्तन जुइ, गुगु गुलिचा थें च्वनी । खास ला झीसं गुकियात गुलिचा धायेगु खः, व ब्रेस्ट टिश्यूज हे जुयाच्वनी । यद्यपि मिनोपाज धुंकाः मिसातय्त ब्रेस्ट क्यान्सर जुइगु खतरा धाःसा अप्वयेफु ।

१४) हार्मोन रिप्लेसमेन्ट थेरापी व गर्भनिरोधक वासलं ब्रेस्ट क्यान्सरया सम्भावना तच्वइ
तथ्य ः थौंकन्हय् मिनोपज लिपा अप्वः थें मिसातय्सं हार्मोन रिप्लेसमेन्ट थेरापी कायेगु याइ । गुकी एस्ट्रोजन हार्मोनया हेभी डोज बीगु याइ, अले थुकिया साइड इफेक्टं यानाः ब्रेस्ट क्यान्सरया सम्भावना तच्वइ । गन तक गर्भनिरोधक वासःया खँ दु, न्हापा थुकी खालि एस्ट्रोजन हार्मोन दइगु खः, गुकिं यानाः ब्रेस्ट क्यान्सरया सम्भावना तच्वइ तर आः थज्याःगु वासलय् एस्ट्रोजनया लिसें प्रोजेस्ट्रोनया नं सन्तुलित मात्रा छ्यलेगु याइ । अथे जूगुलिं गर्भनिरोधक वासः (कन्ट्रासेप्टिभ पिल्स)या सेवन सुरक्षित जू ।

१५) थ्व ल्वय् मिसातय्त हे जक जुइगु खः
तथ्य ः थ्व खँ पूवंक सत्य मखु । मिजंतय्के नं ब्रेस्ट क्यान्सरया समस्या खंकेफु । यद्यपि थज्याःगु मामला यक्व हे कम जक खनेदु । अथे खःसां मिजंत नं थ्व मामलाय् सजग जुइमाः । यदि दुरुपिपिचिया जःखः गुलिचा वल अथवा स्याइगु जुल धाःसा छतिं हे लिमबाकुसे डाक्टरया सल्हा कया हे छ्वयेमाः ।

सम्बन्धित बुखँ

LEAVE YOUR COMMENTS