प्लाष्टिक उत्पादन व विक्री बन्द यायेगु जुइ ः पण्डित

येँ – जनसंख्यालिसें वातावरण मन्त्री लालबाबु पण्डितं प्लाष्टिकया म्हिचा उत्पादन व विक्री वितरण बन्द यायेगु धयादीगु दु । मन्त्री पण्डितयात नाप लायेत वःगु नेपाल चेम्बर अफ कमर्सया प्रतिनिधिमण्डल पुचःनापं जूगु भेटवार्ताया इलय् मन्त्री पण्डितं उगु खँ धयादीगु खः ।
वातावरण सुधारया निंतिं कुतः याना वयाच्वनादीम्ह मन्त्री पण्डितं चेम्बरया नायः राजेशकाजी श्रेष्ठया नेतृत्वया प्रतिनिधिमण्डलिसें वातावरण प्रदूषणया न्युनीकारण यायेगु नापं वातावरण स्वच्छ यानातयेत प्लाष्टिकया म्हिचा उत्पादन व विक्री बन्द यायेगु व उकिया निंतिं उद्योग हे बन्द यायेगु धयादीगु खः ।
उगु इलय् मन्त्री पण्डितं वातावरण प्रदूषण नियन्त्रणया निंतिं निजी ख्यःया भूमिका नं उच्च जुइगु धासें सतक सुुचुकुचु यानातयेत दक्वं ख्यःया व्यवसायीतय्त सतकय् फोहर वांछ्वयेगु मयासे बाल्टिनय् तयेगु सन्देश सम्प्रेषण यायेत इनाप यानादीगु खः ।
चेम्बरया नायः श्रेष्ठं वातावरणीय समस्याया कारणं जनजीवनय् लानाच्वंगु प्रभावयात कयाः चर्चा यानादिसें फोहर, धू व कुँया कारणं स्वनिगलय् न्यासि वनेत तकं समस्या जूगु व सतकया सिथय् व्यवसाय यानाच्वंपिं व व्यवसायीतय्त थुकिं समस्या जूगु बारे जानकारी याकूगु खः ।
उगु इलय् वातावरणीय प्रदूषण न्यूनीकरणया निंतिं गुणस्तरीय पेट्रोल व डिजेलया दयेमाःगु नापं सतक निर्माण नं उच्च गुणस्तरया जुइमाःगु खँय् निगू पक्षया दथुइ सहलह जूगु खः ।

सम्बन्धित बुखँ

LEAVE YOUR COMMENTS