बार्सिलोना व बार्यन म्युनिखं च्याम्पियन्स लिगया क्वार्टरफाइनलय्

एजेन्सी- लियोनल मेस्सी च्याम्पियन्स लिगय् थःगु व्यक्तिगत गोल १०० गू पूवंकुसें बार्सिलोनायात नं क्वार्टरफाइनलय् यंकूगु दु ।
वंगु चान्हय् जूगु कासाय् चेल्सीयात ३–० गोलं बुकूगु कासाय् मेस्सीं निगू गोल याःगु खः । निगूगु लेगय् ३–० गोलं त्यायेवं समग्रय् ४–१ गोलं त्याकाः बार्सा क्वार्टरफाइनलय् दुहां वंगु खः । वंगु चान्हय् जूगु कासाय् थप छगू गोल धाःसा डेम्बेलें याःगु खः ।

बार्साया घरेलु मैदान नोउ क्याम्पय् जूगु कासाय् मेस्सीं कासाया स्वंगूगु मिनेटय् हे गोल याःगु खः । थ्व लिपा २० औं मिनेटय् डेम्बेलें थप छगू गोल यात धाःसा ६३ औं मिनेटय् मेस्सीं मेगु गोल याःगु खः ।

च्याम्पियन्स लिगय् १०० गोल थ्यंकेगु रेकर्ड रोनाल्डों तयातःगु खःसा आः मेस्सीं नं रोनाल्डोया बराबरी याःगु दु । मेस्सी १२३ कासाय् १०० गोल पूवंकूगु खःसा रोनाल्डों १४४ गू कासाय् १०० गोल पूवंकूगु खः ।

बुधवाः चान्हय् जूगु मेगु कासाय् बायर्न म्युनिखं बेसिक्टासयात ३–१ गोलं बुकाः क्वार्टरफाइनलय् दुहां वंगु खः ।

सम्बन्धित बुखँ

LEAVE YOUR COMMENTS