अन्ततः प्रधानन्यायाधिश पराजुली पदमुक्त

अन्ततः सर्वोच्च अदालतया प्रधानन्यायाधिश गोपाल पराजुली पदमुक्त जूगु दु । सर्वोच्चया न्यायाधिशतय्सं बेन्च बहिष्कार यायेवं नैतिक दबावय् लानाच्वंम्ह प्रन्या पराजुली पदमुक्त जुयादीगु खः ।
न्याय परिषद सचिवालयं प्रन्या पराजुली पदमुक्त जूगु जानकारी बिउगु खः । न्याय परिषद्या सचिव नृपध्वज निरौलां प्रन्या पराजुली पदय् मदुगु जानकरी राष्ट्रपति ज्याकूयात छ्वःगु खः । निरौलाया ल्हाःचिं तयाः पराजुलीयात बुझे याःगु पती २०७४ साउन २१ गते हे अवकाश जुइगु जानकारी याकूगु खः ।
परिषद्या पती धयातःगु दु, ‘सम्माननीय महोदयया ६५ दँया उमेर २०७४/४/२१ गते हे पुरा जुइधुंकूगु खने दुगुलिं थौं मिति २०७४/११/३०या सचिवस्तरीय निर्णयकथं सम्माननीय महोदय् पदय् मदयेधुकूगु जानकारी याकाच्वना ।’
पराजुलीया परिषद्या सचिवालयय् दुगु नागरिकता, शैक्षिक योग्यता, मेमेगु विवरण नापं परीक्षा नियन्त्रण कार्यालय सानोठिमी ख्वपपाखें प्राप्त पौसहितया लिधंसाय् उगु निर्णय यानागु न्याय परिषद्या पती न्ह्यथनातःगु दु ।
निगूगु कार्यकालया निंतिं राष्ट्रपतिइ निर्वाचित जुयादीम्ह विद्यादेवी भण्डारीयात शपथ नकेत शीतल निवास झायादीम्ह प्रन्या पराजुलीयात न्याय परिषदं पदय् मदुगु व्यहोराया पौ बिउगु खः ।
यद्यपि राष्ट्रपति भण्डारीयात सपथ ग्रहण धाःसा वय्कलं हे याकादीगु खः । वय्कः पदय् मदुगु पौ शपथ नके धुंकाः बिउगु खः वा नके न्ह्यः हे बिउगु धइगु बारे छुं सीमदुनि ।

सम्बन्धित बुखँ

LEAVE YOUR COMMENTS