बैंकर्स संघ व एनआइसी बैंक दथुइ सहमति

येँ – निक्षेपय् ब्याजदरया खँय् विवाद जुयाच्वंगु बैंकर्स संघ व एनआइसी एसिया बैंक दथुइ सहमति जूगु दु । नेपाल राष्ट्र बंैकया पहलय् थ्व विवाद ज्यंकूगु खः । सहमति कथं आः एनआइसी बंैकं निक्षेपय् ब्याजदर म्हो याइगु जूगु दु । निक्षेप म्हो जुयाः बैंकतय् दथुइ ब्याज अप्वयेकेगु प्रतिस्पर्धा जुयाच्वंगु इलय् बैंकर्स संघं अप्वलय् थुलि तक ब्याज बिइगु धकाः क्वःछिउगु सीमा स्वयां अप्वः ब्याज बियाः एनआईसी निक्षेप दुकायेवं विवाद जूगु खः । विवादया झ्वलय् मेमेगु वाणिज्य बैकतय्सं एनआइसीलिसे आन्तरिक कारोवार मयायेगु क्वःछिउगु खः । ब्याज सीमायात कयाः संघं सिन्डिकेट लागू याःगु धकाः द्वपं बियाच्वंगु एनआइसी म्हिगः धाःसा संघय् सहमति जूकथं हे ब्याजदर क्वकायेत सहमत जूगु खः । बैंकर्स संघया अध्यक्ष सहित राष्ट्र बैंकय् जूगु बैठक लिपा एनआइसी सहमति कथं ब्याज क्वकायेत तयार जूगु खः । आः एनआइसी बैंकं नं मुद्दतीइ ११ प्रतिशतं अप्वः व बचतय् ८ प्रतिशतं अप्वः ब्याज मबीगु जूगु दु ।

सहमति कथं शुक्रवाः तक अप्वयेकूगु ब्याजदर कथें ब्याज बीगु व वयां लिपा न्हूगुु खाताय् ११ व ८ प्रतिशतं अप्वः ब्याज मबीगु खँ एनआइसी एसिया बैंकं धाःगु दु ।थ्वयां न्ह्यः बैंकर्स संघं मुद्दती ११ व बचतय् ८ प्रतिशत जक ब्याज बीगु सहमति जूगु खःसां एनआइसी बैंकं मुद्दतीइ १२ व बचतय् १० प्रतिशत तक ब्याज बिउगु खः । संघया सहमति अःखः एनआइसी याकःचां जक ब्याज अप्वः बिइवं संघय् आवद्ध मेमेगु सकलें बैंकं एनआइसीलिसे आन्तरिक कारोवार मयायेगु क्वःछिउगु खः । बैंकय् तरलता मगातकि बैंकतय् दथुइ अप्वः ब्याज बियाः ध्यबा दुकायेगु प्रतिस्पर्धा जुइ । उकियात नियन्त्रण यायेत बैंकर्स संघं इलय्ब्यलय् थथे ब्याजदरया सीमा क्वःछिइगु याना वयाच्वंगु दु । राष्ट्र बैंकं नं बैंकिंग प्रणालीइ लगानीयोग्य ध्यबा अभाव जुयाच्वंबलय् सकलें मिले जुया वनेमाः धकाः निगू पक्षयात सहमति याकूगु खः ।

सम्बन्धित बुखँ

LEAVE YOUR COMMENTS