पत्ता लगे जुइमखु हवाई दुर्घटनाया कारण

वंगु सोमवाः नेपाःया हवाई यातायातया क्षेत्रय् मेगु छगू दुखद्पूर्ण घटना जुल । त्रिभुवन अन्तर्राष्ट्रिय विमानस्तथलय् बंगलादेशया युएस बंगलाया विमान दुर्घटना जुल । उगु दर्घटनाय् विमानय् प्यम्ह चालक दलया सदस्य नापं ७१ यात्रु दुगु खः । उकी मध्ये ४९ यात्रु सीगु दु । नेपालय् जूगु हवाई दुर्घटना मध्ये थ्व छगू तःधंगु हवाई दुर्घटना खः । दुर्घटनाय् लाःगु विमान बंगलादेशया निजी हवाइ सेवा प्रदाक संस्था युएस बंगला समूहं संचालन याःगु विमान लाःगु खः । सन् २०१० य् स्थापना जूगु वायु सेवा प्रदायक कम्पनीं थनिं प्यदँ न्ह्यः सन् २०१४ निसें जक सेवा शुरु याःगु खः । न्हापां आन्तरिक उडानपाखें सेवा शुरु याःगु कम्पनीं निदँ न्ह्यः सन् २०१६ निसें जक अन्तर्राष्ट्रिय उडान नं शुरु याःगु खः । वालय् प्यन्हु येँया निंतिं उडान याइगु उगु वायु सेवा कम्पनीयात बंगलादेशया हे छगू प्रतिष्ठित वायु सेवा कम्पनीया रुपय् कायेगु याः । उगु विमान कम्पनीं बंगलादेशय् आन्तरिक उडान यायेगु नापनापं नेपाःलिसें भारत, मलेशिया, ओमान, कतार सिंगापुर व थाइल्याण्डय् अन्तर्राष्ट्रिय उडान याना वयाच्वंगु दु ।

नेपाल नागरिक उड्डयन प्राधिकरणया पुलांम्ह महानिर्देशक त्रिरत्न मानन्धरया कथं वंगु सोमवाः जूगु विमान दुर्घटनायात गम्भिर प्रकृतिया दुर्घटनाया रुपय् टिप्पणी यानादी । वय्कलं धयादी, ‘तःधंगु नापं गम्भिर दुर्घटना जूगु दु, छु गुगु कारणं जहाज दुर्घटनाय् लाःगु खः, छानविन लिपा हे जक सीके फइ । तर न्ह्यागु हे कारणं जूसां थ्व तसकं ग्यानापुगु दुर्घटना खः ।’ विमानस्थलय् हे थुगु स्तरया दुर्घटना जुइगु धइगु नं थप संवेदनशीलताया विषय जूगु वय्कःया धापू दु ।सामान्यत अन्तर्राष्ट्रिय उडानं येँ दुहां वइगु विमान कोटेश्वरपाखेया धावन मार्गं अवतरण याइगु खः । तर सोमवाः दुर्घटनाय् लाःगु विमान धाःसा पशुपतिपाखेया धावनमार्गं अवतरण यायेत स्वःगु खनेदु । न्ह्याखें अवतरण याःसां दुर्घटनाय् लाःगु जहाजं विमानस्थलय् पार्किङ यानातःगु मेमेगु जहाजयात धाःसा बचे याःगु दु । त्रिभुवन अन्तर्राष्ट्रिय विमानस्थलया महाप्रबन्धक राजकुमार क्षेत्रीयाकथं विमानस्थलय् वयाः विमान दुर्घटना जुइगु धइगु दुःखद् घटना खः ।

जहाज भचा जक उखेथुखे जूगु जूसा थप क्षति जुइगु अवस्था नं दुगु खः । प्रत्यक्षदर्शीतय्कथं युएस बंगलाया विमान दुर्घटना जूगु इलय् छगः स्वदेशी वायु सेवा प्रदायक कम्पनीया जहाज उडानया तयारीइ दुगु खः । विमान दुर्घटनाया खबर उघ्रिमय् देश विदेशय् तकं न्यना वन । प्रधानमन्त्री केपी शर्मा ओली व गृहमन्त्री रामबहादुर थापां उद्धार ज्याया प्रत्यक्ष अवलोकन यानाः निर्देशन नं बियादीगु खः । घाःपाः जूपिंत इमित वासः याकाच्वंगु अस्पतालय् वनाः उपचारय् छुं नं कसर मल्यंकेत प्रधानमन्त्री निर्देशन बियादीगु खः । दुर्घटनाय् लानाः ४९ म्ह यात्रु सीगु दुसा २१ म्ह घाःपाः जूगु महाप्रबन्धक क्षेत्रीया धापू दु । विमानय् चालक दलया सदस्य नापं ७१ म्ह यात्रु दुगु खः । नेपाःया हवाई दुर्घटनाया इतिहासयात स्वयेगु खःसा आतकया दुने खुगू दर्जन विमान दुर्घटना जुइधुंकूगु दु । सन् १९९१ जुन ९ कुन्हु नेपाल वायु सेवा निगमया जहाज दुर्घटनाय् लाःगु खः । येँय् नं लुक्लाया निंतिं उडान याःगु जहाज दुर्घटनाय् लानाः चालक दलया प्यम्ह नापं १४ म्ह सीगु खः । नेपालय् न्हापांगु हवाई दुर्घटना सन् १०७३ अक्टोबर ६ कुन्हु जूगु धइगु दु ।

उकियात हे आधार कयाः धायेगु खःसा आतकया दुने नेपालय् ७२ गू हवाई दुर्घटना जूगु दु । हवाई दुर्घटना न्यूनीकरणया निंतिं धकाः तःक्वः तःक्वः हे छानविन समितितकं गठन जूगु दु । प्रतिवेदन तयार याःसां कार्यान्वयन धाःसा जुया मच्वंगुलिं पटक पटक उकथंया हे दुर्घटना दोहोरे जुयाच्वंगु दु । हवाई दुर्घटनाया इतिहासय् थाइ एअरया विमान रसुवाया घोप्टेभरय् दुर्घटना जूगु खः । सन् १९९२ य् जुलाई ३१ य् जूगु उगु दुर्घटनाय् लानाः ११३ म्ह सीगु खः । अथे हे सन् १९९२ सेप्टेम्बर २८ कुन्हु यलया भट्टटेडाँडाय् जूगु पाकिस्तान एअरलाइन्स विमान दुर्घटनाय् नं १६७ यात्रु सीगु खः । थुगु दुर्घटना हवाई यातायातया क्षेत्रय् १०० औं व नेपाःया भूमिइ जूगु दकलय् तःधंगु हवाई दुर्घटना खः । प्राधिकरणया पुलांम्ह महानिर्देशक मानन्धर गम्भिर प्रकृतिया थज्याःगु दुर्घटनायात कयाः वस्तुनिस्ट अनुसनधान जुइमाःगु धयादी ।

सम्बन्धित बुखँ

LEAVE YOUR COMMENTS