सामुदायिक स्कूलया सफूकुथि परियोजनाय् ब्रम्हलुट

येँ – सामुदायिक स्कूलय् आखः ब्वनीपिं विद्यार्थीतय् पढाईया स्तर बांलायेमा धकाः सरकारं फुक्क हे सामुदायिक स्कूलय् छगू छगू ब्वनेकुथि चायेकाः सफू न्यायेगु लागिं धकाः दँय्दसं बजेटया व्यवस्था यानातःगु दु । तर सामुदायिक स्कूलया प्रधानाध्यापक व सफू मीपिं व्यापारीत मिले जुयाः सरकारया उगु पुस्तकालय कार्यक्रमया बजेटय् ब्रम्हलुट यानाच्वंगु लूगु दु ।
गुलिं स्कूलतय्सं पुस्तकालया सफू न्यायेत धकाः वःगु ध्यबा स्कूलया भवन दयेकेगु ज्याय् खर्च यानाच्वंगु दुसा गुलिं स्कूलया प्रधानाध्यापकतय्सं निद्वः प्यद्वःया सफू न्यानाः बाँकी ध्यबा थम्हं तुं नयेगु ज्या यानाच्वंगु नं लूगु दु । सुनसरीया कोशी मावि महेन्द्रनगरया प्रअ बालकृष्ण अधिकारीं छगू प्रकाशन संस्थाय् वयाः सफू हे मन्यासे छगूत्या लाख तकाया बील दयेका यंकूगु खँ सीदुगु दु ।सरकारं प्रत्येक स्कूलय् पुस्तकालय दयेकेगु व सफू न्यायेगु लागिं धकाः दँय् ६ लाख ५० द्वः तकाया ल्याखं ६ अर्ब ५० करोड तकाया बजेट विनियोजन याःगु खः ।

तर थ्व ध्यबा ध्यबा निकासी याइगु जिल्ला शिक्षा कार्यालय, स्कूलया व्यवस्थापन समिति वा प्रधानाध्यापक व सपूm प्रकाशन याइगु संस्था जानाः दथुइ हे नयेगु ज्या यानाच्वंगु खः ।जिल्ला शिक्षा कार्यालयं बजेट निकासा याइगु जुल व थ्व बजेट थन थन स्कूलय् वन धकाः कार्यालयया कर्मचारीतय्सं सफू प्रकाशन याइगु संस्थायात जानकारी बीगु जुयाच्वन । अले प्रकाशन संस्था अज्याःगु स्कूलय् वनाः ‘मार्केटिङ’ याः वनी । अथे मार्केटिङ याः वनीबलय् उमिसं थःपिनि सफू न्याःसा भारी छुट नं बी, ‘मिले नं याना बी’ धकाः प्रलोभन क्यनी । अज्याःगु प्रलोभनय् लानाः स्कूलं थम्हं नां तक हे मन्यंगु सफू नं प्रकाशन संस्थापाखें न्याना काइ । अले प्रकाशन संस्थां नं थःपिंसं गोदामय् वांछ्वया तःगु सफुली मूल्य थपे यानाः तिकेगु व वहे सफू ५० प्रतिशत छुट बियाः मीगु याइ । अज्याःगु सफू गुलिखे स्कूलतय्सं बोरा तकं मचायेकुसे तया तइगु खँ नं सीदुगु दु । थुकी डिकुरा प्रकाशनं वांछ्वयेत्यंगु पुलांगु सफू ज्वंकीगु व साझा प्रकाशनं ला पुलांगु ‘गरिमा’ पत्रिका बोराय् कोचे यानाः छ्वया हःगु नं सीदुगु दु ।थ्व ब्रम्हलुट बारे शिक्षा विभागं कडा निगरानी तयेमाःगु सः थ्वया वःगु दु ।

सम्बन्धित बुखँ

LEAVE YOUR COMMENTS