सिरियाय् मस्त झन जोखिमय्

संयुक्त राष्ट्र संघं सिरियाय् जुयाच्वंगु हिंसात्मक द्वन्द्वय् मस्तय् तसकं जोखिमय् लानाच्वंगु खँ धाःगु दु । द्वन्द्व सुरु जूगु च्यादँया दुने थनया समस्या ज्यनेगु स्वयां झन जक तच्वया वनाच्वंगु खँ अन्तर्राष्ट्रिय सञ्चारय् वयाच्वंगु दु । राष्ट्र संघया मस्तय् मामिला स्वइगु संगठन युनिसेफं पितबिउगु लिपांगु तथ्यांक कथं सिरियाय् द्वन्द्वःया कारणं मस्तय् हत्या जुइगु अप्वया वनाच्वंगु दु । न्हूगु तथ्यांक कथं सन् २०१६या तुलनाय् २०१७य् द्वन्द्वया कारणं मस्तय् मृत्युदर ५० प्रतिशतं अप्वःगु दु । युनिसेफं थ्व क्रम सन् २०१८ य् झन अप्वया वनाच्वंगु खँ धाःगु दु । सिरियाया विद्रोहीतय् आधार क्षेत्र जुयाच्वंगु पूर्वी गुटाय् सिरियाली सरकार व रुसी सेनां याःगु स्थल व हवाइ आक्रमणय् लानाः थ्व दँया फेबु्रअरीइ जक निसःम्हं मल्याक मस्त सीधुंकूगु दावी मानवाधिकारवादी संघसंस्थातय्सं यानाच्वंगु दु ।सिरियाय् वनाच्वंगु मानवअधिकार अनुगमन पुचलं धाःगु दु, ‘गुटाय् सरकारी पक्षं जुयाच्वंगु आक्रमणय् न्याम्ह सर्वसाधारण सीबलय् उकी छम्ह मचा लानाच्वंगु दु ।’

सम्बन्धित बुखँ

LEAVE YOUR COMMENTS