सकसिया ध्यान बचे जूम्ह पाइलटपाखे

दुर्घटनाया कारण बारे आरोप प्रत्यारोप

येँ– त्रिभुनव विमानस्थलय् सोमवाः जूगु विमान दुर्घटनायात कयाः सकसिया मिखा आः दुर्घटनाय् बचे जूम्ह पाइलट आबिद हसनपाखे वंगु दु । पाइलट आबिद हसन बचे जूगु खँ दुर्घटनाय् लाःगु विमान कम्पनी युएस बांग्ला एयरलाइन्सं धायेधुंकूगु दु ।

थ्व दुर्घटनायात कयाः आः नेपाःया विमानस्थलया कन्ट्रोल टावर व विमान कम्पनीया दथुइ विवाद ब्वलनाच्वंगु दु । विमानस्थलं पाइलटया गल्तीं यानाः विमान दुर्घटना जूगु धयाच्वंगु दुसा विमान कम्पनीं टावरं हे गलत सुचं बिउगुलिं पाइलट विमान अवतरण यायेत अलमल जुयाः दुर्घटना जूगु धयाच्वंगु दु ।

थ्व अवस्थाय् आः दुर्घटनाय् बचे जूम्ह पाइलट आबिद हसदपाखे सकसिया ध्यान वनाच्वंगु दु । आबिद हसनया आः उपचार जुयाच्वंगु दु । हसन न्हापा बंगलादेश एयरफोर्सया पाइलट खःसा व प्रशिक्षक पाइलट नं जूगु खँ विमान कम्पनीं धाःगु दु ।

युएस बांग्ला एयरलाइन्स पाइलटं छुं गल्ती मयाःगु खँ धासें नेपाःया एयरपोर्ट ट्राफिक कन्ट्रोलं (एटिसी)पाखें वःगु जानकारी कथं हे विमान ल्यान्ड यायेत स्वःगु खँ धाःगु दु । तर उड्डयन प्राधिकरणया निर्देशक संजीव गौतमं विमानयात एयरपोर्टया दक्षिणी रनवेपाखे अवतरण यायेत स्वीकृति बिउगु खःसां विमान उत्तरपाखेया रनवें नं कुहां वःगु व असामान्य रुपं अवतरण जूगु खँ धयादीगु दु ।

दुर्घटना लिपा युएस बांग्ला एयरलाइन्सया सिइओ आसिफ इमरानं ढाकाय् छगू पत्रकार सम्मेलन यानाः दुर्घटनाग्रस्त विमानया पाइलट व एयरपोर्ट ट्राफिक कन्ट्रोल दथुइ जूगु खँल्हाबल्हाया क्लिप वयेधुंकूगु व थ्व क्लिप युट्युबय् नं दुगु खँ धयादीगु दु । वय्कलं ट्राफिक कन्ट्रोलपाखें स्वंगू मिनेटया दुने तःगू हे सन्देश पाइलटयात बिउगु व तःगू सन्देशया कारणं पाइलट अलमल जुयाः दुर्घटना जूगु खँ सिइओ इमरानं धयादीगु दु ।

दुर्घटनायात छानविनया निंतिं बंगलादेया नागरिक उड्डयन प्राधिकरणं नं स्वम्ह दुजः दुगु छानविन कमिटी गठन याःगु दु । थ्व कमिटीं आः येँय् वयाः जाँचबुझ याइगु जूगु दु ।

मेखे उडान गतिविधि स्वइगु फ्लाइट राडर २४ पाखें छगू ट्विट यासें विमान दुर्घटनाया इलय् आकाझाकां थहांकुहां जूगु खँ च्वःगु दु । फ्लाइट राडर २४या कथं ग्रीनविच ई कथं ८ः२६ य् विमान ४४०० फिट उचाइलय् कुहां वल, हाकनं ६६०० फिट उचाइ तक वन । अले करिब ८ः३३ पाखे विमान दुर्घटना जुल ।
विमानय् दुगु ब्लाय्क बक्स लुइकेधुंकूगु दु । आः ब्लाय्कबक्सपाखें नं ट्राफिक कन्ट्रोलर व पाइलटया दथुइ छु खँल्हाबल्हा जुल धयागु जानकारी वइ ।

सम्बन्धित बुखँ

LEAVE YOUR COMMENTS