१०८ दँ दुम्ह जिथियात सम्मान यासें १०८ क्वःगु मिसा दिवस

येँ – १०८ क्वःगु अन्तर्राष्ट्रिय मिसा दिवसया लसताय् म्हिगः येँया सतुंगलय् १०८ दँ दुम्ह जिथियात सम्मान यायेगु ज्या जुल । सतुंगःया बालकुमारी द्यःयाथाय् न्हापांगु पलाः नेवाः मिसा पुचःया ग्वसालय् जूगु ज्याझ्वलय् सतुंगःयाम्ह हे १०८ दँ दुम्ह मय्जु पूर्णलक्ष्मी अमात्ययात हनेगु ज्या जूगु खः ।
न्हापांगु पलाःया नायः शिला साय्मिया सभापतित्वय् जूगु उगु ज्याझ्वलय् न्हापांगु पलाःपाखें कःघानातःपिं येँया न्हूघः त्वाः जःखः च्वंपिं आपालं जिथिपिनि उपस्थिति दुगु खः । ज्याझ्वलय् मूपाहां कथं पुलांम्ह मन्त्री लिसें सांसद भिमसेनदास प्रधान झाःगु खः । उगु हे ज्याझ्वलय् नेपालभाषाया बाखं च्वमि लिसें बौद्धिक अपांग मस्तय् संस्था सुनगाभाया नकिं व नेपाः राष्ट्रिय पार्टीया वरिष्ठ नेता सुवर्णकेशरी चित्रकारयात नं हनेगु ज्या जूगु खः । ज्याझ्वलय् नेपालभाषा टाइम्सया सम्पादक सुरेश किरण मानन्धरं नेपाल सरकारं मिसापिंत बियातःगु थीथी सुविधा सम्बन्धी सुचंया बारे जानकारी बियादीगु खः ।

सम्बन्धित बुखँ

LEAVE YOUR COMMENTS