प्रम ओलीं थौं विश्वासया मत काइगु, दुई तिहाइ स्वयां अप्वः वइगु

येँ– प्रधानमन्त्री केपी ओलीं थौं संसदय् विश्वासया मत काइगु जूगु दु । संसदया बैठक थौं न्हिनय् १ बजे च्वनेत्यंगु दु ।
प्रम ओलीयात दुई तिहाइ स्वयां अप्वः मत वइगु खँ धाःगु दु । दुई तिहाइया निंतिं १८२ मत माःसा ओलीयात २०९ स्वयां अप्वः मत वइगु खँ धाःगु दु । प्रतिनिधि सभाय् २७५ म्ह सांसद दु ।

ओलीयात गठबन्धनय् वनेत्यंगु एमाले व माओवादीया लिसें राष्ट्रिय प्रजातन्त्र पार्टी, राष्ट्रिय जनता दल, संघीय समाजवादी फोरमपिनिगु मत वइगु जूगु दु । फोरमं थौं १२ बजे च्वनीगु बैठकं जक निर्णय यायेगु धाःसां सरकारय् हे वनेगु क्वःछी धुंकूगुलिं पक्षय् हे मत बिइगु जुइ ।

राजपा ओलीया पक्षय् मत बीगु निर्णय यानातयेधुंकूगु दुसा राप्रपां पाखें नं थौं प्रवक्ता भुवन पाठकं छगू विज्ञप्ति जारी यासें प्रम ओलीयात समर्थन यायेगु धाःगु दु ।
आः नयाँ शक्ति व नेपाल मजदूर किसान पार्टी जक निर्णय याये ल्यं दनि । नेपाली कांग्रेस प्रमुख प्रतिपक्षी जुइगु जुइ ।