विश्वकप २०१८

थौकन्हय् विश्व फुटबलय् ‘पार्क द बस’ खुब हे न्यने दु । नकतिनि हे इंग्लिस प्रिमियर लिगय् म्यानचेस्टर सिटी व चेल्सी दुथइ कासा जुल । उगु कासा म्यानचेस्टर सिटीं १–० गोलं त्याकूगु खः । अले कासा जूगु खः– सिटीया होम ग्राउन्ड एडिहाडय् । उगु कासाय् चेल्सीं सिटीविरुद्ध छगू नं आक्रमण मयाः । उकिं हे चेल्सीया ‘सट अन टार्गेट’ छगू नं मदु । फुटबल, उकिसनं इंग्लिस कासा, उकिं थ्वनाप स्वाना वइगु यक्वः धयाथें प्राविधिक खँग्वः इंग्लिसं हे जुइ । अले थुपिं खँग्वः अग्रेजीं न्यनेबलय् हे पाय्छि ताः । खँ न्ह्याःगु जुइमा, हाकनं व हे सिटीविरुद्ध चेल्सीया कासाय् लिहां वने । कासाया कमेन्ट्री यानाच्वंपिं सकसिनं कासाया झ्वलय् ‘पार्क द बस’ तःक्वः हे धाल । उलि जक मखु, कन्हय् कुन्हु समाचारय् नं थ्व हे जक खने दत, ‘पार्क द बस’ । थथे छाय् धाःसा चेल्सीं उगु कासाय् छगू नं आक्रमण मयाः । अले थुकिया अर्थ, क्लबं छम्ह नं स्ट्राइकरयात उगु कासाय् मम्हितकूगु खः ।
म्हितकूसां वयात स्ट्राइकरया भूमिकाय् मछ्यः । चेल्सीया गुलि नं कासामि दु, सकसिनं डिफेन्डरया ल्याखं जक म्हितल । अथे धयागु गोलकिपर छम्ह त्वःताः झिम्ह डिफेन्डर । थथे जुलकि प्रतिद्वन्द्वी टिमयात गोल यायेत तसकं थाकुइगु जुइ । थाकुइगु छु धकाः, असम्भव थें हे जुइ ।

सिटीं भाग्यं छगू गोल याःगु खः । चेल्सीया थ्व रणनीतियात कयाः क्लबमा इटालियन प्रशिक्षक एन्टोनियो कोन्टेया तसकं आलोचना जुयाच्वंगु दु ।
चेल्सी थें जाःगु क्लबं नं थथे म्हितेमाः ला रु यक्वसिया न्ह्यसः खः । आखिरय् चेल्सी डिफेन्डिङ च्याम्पियन खः । छगू कथं धायेगु खःसा ‘पार्क द बस’ रणनीति सुरु याःगु टिम नं चेल्सी हे खः । उबलय् चेल्सीया प्रशिक्षक खः, जोसे मोउरिन्हो । थौकन्हय् थुम्ह पोर्चुगाली प्रशिक्षक म्यानचेस्टर युनाइटेडय् दु । सन् २०१३ य् छगू इलय् लिभरपुलं लिग उपाधि त्याकेगु स्थितिइ थ्यंगु खः । उगु हे इलय् लिभरपुलया निर्णायक कासा चेल्सीनाप लात, व नं एनफिल्डय् । उगु कासाय् मोउरिन्हों झिम्ह कासामियात डिफेन्डरया भूमिकाय् म्हितकूगु खः । उबलय् लिभरपुलया प्रशिक्षक खः, ब्रेन्डन रोजर्स । कासा क्वचायेवं मिडियायात प्रतिक्रिया बीगु झ्वलय् वं धाःगु जुयाच्वन, ‘चेल्सीं तसकं डिफेन्सिभ म्हितल ।

धाथें धायेगु खःसा चेल्सीं थः सकतां कासामियात डिफेन्डरया ल्याखं म्हितकल । चेल्सीया पोस्टपाखे ला खालि बस जक पार्क यानाः तःगु खः ।’ अर्थात ‘पार्क द बस’ । थ्व धुंकाः थ्व खँग्वः खुब हे छ्यलेगु यात । अले टिमतय्सं इलय्ब्यलय् थ्व रणनीतियात उतिकं लागू याना वयाच्वंगु नं दु, गथे चेल्सीं नकतिनि सिटीविरुद्ध यात ।सुं छगू टिमं तसकं बांलाक म्हिताच्वंगु दु, अले वया आक्रमण तसकं बल्लाः धाःसा विपक्षी टिमं गुबलें गुबलें थथे हे तसकं डिफेन्डिभ म्हितेमाली । थुकिया हे भ्mवलय् ‘पार्क द बस’ थेंजाःगु स्थिति तयार जुइ । थज्याःगु कासा स्वयेबलय् न्ह्यइपुसे मच्वने नं यः, उकिं नं थुकिया आलोचना जुइ । अय्नं थथे यानाः म्हितेगु धाःसा त्वतीमखु, थ्व नं पक्का खः ।

सम्बन्धित बुखँ

LEAVE YOUR COMMENTS