विश्वकप २०१८

‘राज्यपाखें उपलब्ध सुविधा नेवाः संचारकःमियागु नं अधिकार खः’

येँ – नेवाः पत्रकारिता ख्यलय् न्हूगु लय्पौ पिदंगु दु । नेवाः पत्रकार राष्ट्रिय दबू येँ जिल्लां थौं छगू ज्याझ्वः यासें ‘नेवाः जः’ लय्पौ विमोचन याःगु दु । प्रतिनिधि सभा व प्रदेश सभाया नेवाः सांसद लिसें संचार ख्यलय् सक्रिय वरिष्ठ नेवाः पत्रकारपिंसं मंकाः कथं ‘नेवाः जः’ लय्पौया सानुकाजी विशेषाङ्क विमोचन यानादीगु खः । पत्रकार राष्ट्रिय दबू, येँ जिल्लाया दांभरिं मदुम्ह सानुकाजी महर्जनया दकिलाय् लाकाः सानुकाजी विशेषांक पिथंगु खः ।

ज्याझ्वलय् न्ववानादिसें सांसद कृष्णगोपाल श्रेष्ठं राज्यपाखें संचार क्षेत्रय् उपलब्ध सुविधा नेवाः संचारकःमिपिनिगु नं अधिकार खः धयादीगु दु । नेवाः संचारकःमिपिंसं नं राज्यपाखें उपलब्ध स्वास्थ्य लगायतया थीथी सुविधा थःगु अधिकार कथं कायेमाःगु खँ न्ह्यथनादिसें वय्कलं धयादिल, ‘विशेष यानाः नेवाः संचारकःमिपिंसं स्वास्थ्य सम्बन्धि समस्या जुइबलय् राज्यपाखें उपलब्ध सुविधा कायेगुपाखे ध्यान हे मबिउगु खनेदु । व सुविधा धयागु ला नेवाः पत्रकारतय्गु नं अधिकार खः ।’

वरिष्ठ पत्रकार पुष्कर माथेमां नेवाः संचार ख्यलय् नेवाः पत्रपत्रिकात पिदनीगु तर निरन्तरता म्हो हे जक खनेदयाच्वंगु सन्दर्भ न्ह्यथनादिसें धयादिल, ‘पत्रकार दबू थेंज्याःगु संगठन विकास जुइधुंकाः आः पिदनाच्वंगु पत्रिका निरन्तर न्ह्याःवनीगु लिसें दिनाच्वंगु पत्रिकात नं हाकनं न्ह्याकेगु वातावरण दयेकेमाः ।’ पत्रकारतय्गु हकहितया सः थ्वयेकेत नीस्वंगु संस्थां नेवाः लय्पौ पिथनेगु ज्या याःगु खँय् पत्रकार दबूया केन्द्रीय नायः श्रीकृष्ण महर्जनं लसता प्वंकादिल । नेवाः जः लय्पौ सानुकाजी विशेषाङ्क पिथनाः छम्ह नेवाः पत्रकारयात अमर दयेकेगु ज्याय् पत्रकार दबू येँ जिल्लां योगदान बिउगु बिचाः वय्कलं प्वंकादिल ।

नेवाः जः लय्पौया सम्पादक लिसें पत्रकार दबू येँ जिल्लाया न्वकू बिराजकाजी राजोपाध्यायं संचार क्षेत्रयात राज्यया प्यंगूगु अंग कथं काइगु खँ न्ह्यथँसें देय् संघीयताय् वनेधुंकूगु अवस्थाय् प्रदेश ३ य् नेवाः संचार क्षेत्रया थाय्या विषयय् नेवाः सांसद्पिंसं बिचाः यायेमाःगु खँ न्ह्यथनादिल । नेवाः संचार ख्यःया लिसें नेवाः संचार सम्वद्ध संगठन, नेवाः संचार गृहयात ग्वाहालिया निंतिं पहल यायेत वय्कलं माग यानादीगु खः ।

ज्याझ्वलय् लसकुस यासें पत्रकार दबू येँ जिल्लाया छ्याञ्जे प्रजीत शाक्यं मदुम्ह पत्रकार सानुकाजी महर्जनं नेवाः संचार ख्यलय् बिउगु योगदानयात लुमंकुसें नेवाः संचारकःमिपिनिगु ग्वाहालिया नितिं सानुकाजी कल्याण कोष दयेकेधुनागु जानकारी बियादिल । उगु कोषय् ग्वाहालि यायेत नं छ्यान्जे शाक्यं आव्हान यानादिल । थ्वयां लिपा मदुम्ह सानुकाजी महर्जनया लुमन्तिइ मिडिया कप फुटसल यायेगु घोषणा नं शाक्यं यानादिल ।

पत्रकार दबू येँ जिल्लाया नायः नातिकाजी महर्जनं तःधंगु संचार गृहपाखें नं नेवाःलगायत जनजाति गतिविधिया समाचार प्रकाशन यायेगुलिइ च्यूताः क्यनेमाःगु खँ धयादिल । नेवाः पत्रकारपिनिगु ग्वाहालि व नेवाः संचार गृहयात धिसिलाका यंकेत थःपिं न्ह्याब्लें क्रियाशील जुयाच्वनेगु प्रतिवद्धता नायः महर्जनं प्वंकादिल ।
ज्याझ्वलय् प्रतिनिधि सभा सदस्य जीवनराम श्रेष्ठ, प्रदेश सभा सदस्यपिं बसन्त मानन्धर व राजेश शाक्य, पूर्व राज्यमन्त्री तीर्थराम डंगोल, वरिष्ठ पत्रकार सुरेशकिरण मानन्धर, राजु शाक्य व सुजीव वज्राचार्यपिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS