ख्वनाय् स्थानीय जनताया प्रतिकार जारी, सेनालिसे मुठभेद जुइगु खतरा

यल – फास्ट ट्राय्क दयेकेगु झ्वलय् ख्वनाया स्थानीय नेवाःतय्गु आपालं बुँ अधिकरण यानाः कायेत्यंगु विरोधय् जुयाच्वंगु प्रतिकारया झ्वलय् आः सेनालिसे मुठभेदया समस्या खतरा पिहां वःगु खँ धाःगु दु । उकिं थुकिया बारे राष्ट्रिय मानव अधिकार आयोगयात जानकारी बिसें थःपिंत सेनापाखें सुरक्षाया नामं निजी सम्पत्ति अधिकरणपाखें नं बचे याना बी माल धकाः ज्ञापन बीत्यंगु दु । ख्वनाया पीडिततय्सं कन्हय् शनिवाः सुथय् ११ बजे पूच्वय् मुनाः राष्ट्रिय मानव अधिकार आयोगया ज्याकुथी ज्ञापनपौ बीगु तयारी यानाच्वनागु खँ थ्व अभियानया दुजः असोजकुमार डंगोलं ‘नेपालभाषा टाइम्स’ याना कनादिल । फास्ट ट्राय्क दयेकः वःपिं सैनिकत लिसे प्रतिकार यायां उपिंलिसे छगू चरण वार्ता नं जुइधुंकूगु जानकारी बिसें वय्कलं फास्ट ट्राय्कया लँ मेथासं यंकि धकाः थःपिंसं विकल्प बियागु व सेनां नं हानं मेगु विकल्प न्ह्यःने हःगु खँ कनादिल ।

तर सेनां हःगु न्हूगु विकल्पं ख्वनाया आपालं सांस्कृतिक लागात नष्ट जुइगु जूगुलिं उकिया बारे स्थानीय गुथितलिसे सहलह मयासे लिसः बी मफइगु खँ नं कनादिल । बाह्य रिंगरोड, बागमति कोरिडर व हाइटेन्सन तार समेत ख्वनापाखें यंकेगु सरकारी ग्वसाःया विरुद्ध अनया स्थानीय जनतां प्याकेजया रुपय् सीडिओलिसे खँ ल्हानाः छगू सहमति दयेकूगु दु । तर सेनां मेमेगु खँ समेत दुथ्याःगु अज्याःगु सहमति पालना याये फइ मखु धयाच्वंगु खँ सीदुगु दु । थ्व फुक्क परियोजना खोनाय् शुरु याके बिल धाःसा थनया बछि स्वयां अप्वः बुँ लँय् लानाः नष्ट जुइगु खँ स्थानीय मनूतय्सं धयाच्वंगु दु । उकिं स्थानीय जनतां थ्व फुक्क परियोजना बारे मंकाः कथं खँ ल्हायेत माग यानाच्वंगु दु ।

सम्बन्धित बुखँ

LEAVE YOUR COMMENTS