न्हय्लाया दुने ६८ प्रतिशत विदेशी लगानी अप्वल

येँ – न्हय्लाया दुने ६८ प्रतिशत वैदेशिक लगानी अप्वःगु खँ उद्योग विभागं धाःगु दु । देशय् स्थायी सरकार वइगु निश्चित जुइवं विदेशी लगानीकर्ता उत्साहित जूगु खः । उद्योग विभागया कथं चालू आर्थिक दँया न्हय्लाया दुने १४ अर्ब १५ करोड तका वैदेशिक लगानीकर्तां लगानी यायेगु प्रतिवद्धता प्वंकूगु दु । वंगु दँय् थ्व हे ईया दुने ८ अर्ब ४१ करोड जक वैदेशिक लगानीया प्रतिवद्धता वःगु खः । आः वःगु वैदेशिक लगानीकर्ताया प्रतिवद्धता न्हापांगु दँ स्वयां ६८ प्रतिशतं अप्वः खः । उद्योग विभागया कथं फुक्कं धयाथें क्षेत्रय् वैदेशिक लगानी याइपिनिगु ल्याः अप्वःगु दु । वंगु दँय् कृषि तथा वन पैदावार क्षेत्रय् १५ करोड लगानी यायेगु प्रतिवद्धता वःगु खःसा थुगु दँय् उगु हे ईया दुने झिनिदुगं अप्वः अथे धइगु १ अर्ब ८५ करोड तकाया प्रतिवद्धता वःगु दु । अथेहे उत्पादन क्षेत्रय् वंगु दँय् १ अर्ब १४ करोड तका लगानी प्रतिवद्धता वःगु खःसा थुगु दँय् थहां वनाः ५ अर्ब ७२ करोड तका थ्यंगु दु ।

विभागया कथं दकलय् अप्वः लगानी प्रतिवद्धता खनिज उत्खनन् क्षेत्रय् वःगु दु । खनिज क्षेत्रय् वंगु दँय् ३ करोड जक लगानी प्रतिवद्धता वःगु खःसा थुगुसी २ अर्ब स्वयां अप्वः लगानी प्रतिवद्धता वःगु दु ।विभागया कथं न्हापाया दँ स्वयां थुगु दँय् लगानी क्षेत्र नं अप्वःगु खँ धाःगु दु । न्हापा न्हय्गू क्षेत्रय् जक लगानी वयेगु यानाच्वंगु खःसा थुगु दँय् च्यागू क्षेत्रय् लगानी प्रतिवद्धता वःगु दु । थुगु दँय् सूचना प्रशारण प्रविधि क्षेत्रय् लगानी थप जूगु खः । उगु क्षेत्रय् लगानी वयेवं उकिया निंतिं बिस्कं क्षेत्र दयेकेमाःगु खँ विभागं धाःगु दु । विभागया कथं मेमेगु देशं थुगु क्षेत्रयात बिस्कं महत्व बिया वयाच्वंगु व वैदेशिक लगानी यायेगु क्रम नं अप्वःगुलिं बिस्कं क्षेत्र दयेकेमाःगु खः । उगु क्षेत्रय् जक २६ करोड लगानी यायेगु प्रतिवद्धता वःगु दु ।

सम्बन्धित बुखँ

LEAVE YOUR COMMENTS