ज्ञानमाला रत्नवत सिरपाः रत्न बेहोसीयात

येँ – थुगुसीया ज्ञानमाला रत्नवत सिरपाः नेपालभाषा ख्यःया नांजाःम्ह म्येँ हालामि नापं लय्चिनामि रत्न बेहोसीयात बीगु जूगु दु । ज्ञानमाला भजन खलः, स्वयम्भूपाखें आः नकतिनि छगू पत्रकार सम्मेलन यासें थुकिया जानकारी बिउगु खः । अथे हे बुद्धधर्मया प्रचारय् विशेष योगदान बियाबिज्याःम्ह भिक्षु थानस्थट्ट (जितवन विहार, थानकोट) व ज्ञानमाला भजन खलःपाखे युवक बौद्ध मण्डल नेपालयात नं सिरपाः लःल्हाइगु जूगु दु । थ्व हे वइगु शनिवाः कुन्हु छगू विशेष ज्याझ्वःया दथुइ झिद्वः तका दांया उगु सिरपाः लिसें गुलुपाः सिरपाः नं लःल्हायेगु खलःया नायः तीर्थनारायण महर्जनं पत्रकार सम्मेलनय् जानकारी बियादीगु खः । गुलुपाः सिरपाः विश्वशान्ति विहार, न्हू बानेश्वरयात लःल्हायेगु नापं उकुन्हु हे ज्ञानमाला भजन खलःपाखें दँय्दसं न्यायेका वयाच्वंगु ससुपुजा नं यायेगु जानकारी खलःया उपाध्यक्ष पूर्णकाजी ज्यापुं बियादीगु दु । वि.सं. १९९३ निसें स्वयम्भू ज्ञानमाला भजन खलकं आन्दोलन व भुखाय् थेंज्याःगु विषम परिस्थितिइ नं निरन्तर रुपं ज्ञानमाला भजनयात न्ह्याका वयाच्वनागु व लिपांगु इलय् भजन सतलय् मिं नःसां नं भजन न्ह्याका हे वयाच्वनागु नं पत्रकार सम्मेलनय् जानकारी बिउगु खः ।

सम्बन्धित बुखँ

LEAVE YOUR COMMENTS