आसामया नेवाःतय् पहिचान म्वाकेत नेपाःया पुचः

येँ – भारतया पूर्वोत्तर पहाडी राज्य आसामय् च्वंपिं नेवाःतय् पहिचान म्वाकेगु ताः तयाः नेपाःया छगू पुचः थौं उखे वनेत्यंगु दु । संस्कृतिविद् गणेशराम लाछिया नेतृत्वय् भाषा, लिपि, बाजं, नसात्वँसा आदि विषयया विज्ञपिं दुथ्याःगु १५ म्हेसिया छगू पुचः उखे वनेत्यंगु खः ।सिक्किमय् थें आसामय् नं स्थानीय नेवाःतय्त राज्य सरकारं घोषणा याना तःगु आदिवासी जनजातिया धलखय् दुथ्याकेगु लागिं थ्व पुचः उखे वनेत्यंगु खः । नेवाःत नं थःगु हे बिस्कं भाषा, लिपि, वसः, नसात्वँसा, संस्कृति, भेषभुषा दुगु समुदाय खः धकाः अनया सरकारयात क्यनेगु थ्व पुचःया उद्देश्य जूगु खँ पुचःया नायः गणेशराम लाछिं ‘नेपालभाषा टाइम्स’ यात कनादिल ।

थ्वहे वइगु फागुन २७ गते कुन्हु सुथय् ६ बजेनिसें बहनी ९ बजे तक आसामया राजधानी गुवाहाटीइ नेवाःतय् थ्व प्रदर्शन जुइ । थुकी नेवाः बाजं थानाः नेवाः हुलाप्याखं क्यनेगु लिसें नेवाः नसात्वँसाया स्टल तयाः मीगु नं ज्या जुइ ।वकुन्हु हे सुथय् सकस्यां ल्हातय् सुकुन्दा ज्वनाः ¥याली पिहां वइगु नं ग्वसाः दु । उकी सहभागी सकस्यां नेवाः वसः पुनाः ब्वति काइ । आसाम सरकारं क्वःछिना तःगु आदिवासी धलखय् नां दुथ्यात धाःसा अनया सरकारी जागिर, शिक्षा आदि लगायत थीथी ख्यलय् कोटा व छुटया सुविधा दइ । आः तक आसामया नेवाःत थ्व सुविधापाखें बञ्चित जुइ मालाच्वंगु दु ।
आसामया हे कामारुकामाक्षं बुंगद्यः नेपाः हःगु किंवदन्ती दु । आसामय् १५ द्वःया ल्याखय् नेवाःत दुसां उमिसं नेवाः भाय् व संस्कार–संस्कृति धाःसा छुं हे मसीधुंकल । आसामी भाय् व लिपि बंगालीलिसे यक्व मिले जू । आसामय् खस नेपाली भाय् ल्हाइपिं मनूतय् ल्याः धाःसा यक्व दु ।

सम्बन्धित बुखँ

LEAVE YOUR COMMENTS