विश्वकप २०१८

कलिउडया राईजिङ्ग हिरोत

कलिउडय् थौंकन्हय् न्हूपिं ल्याय्म्ह हिरोत यक्व खनेदया वयाच्वंगु दु । अर्थात ई भुवन के.सी.या ई मखसे अनमोल के.सी.या ई खः । अनमोल ल्याय्म्ह पुस्ताया हिरोत मध्येय् न्ह्यःनेलानाच्वंम्ह हिरो खः । अनमोलया थेंज्याःगु क्रेज थौंकन्हय् मेपिं सुयां मदु । थ्व हे कारणं वयागु छगू न्हूगु फिल्म “कृ” दकलय् सकलय् चर्चित फिल्म कथंन्ह्यःने लानाच्वंगु दु । वयागु क्रेज थुलि अप्वया वःगु दु कि वयात झरना थापां न्यय्गू लाख तकातक पारिश्रमिक बीत तयार दु धाल धकाः छक्वः बय्बय् नं जुल । अनमोलया क्रेजं थौंकन्हय्या ई धइगु ल्याय्म्ह पुस्ताया ई खः धयागु क्यंगु दु । फिल्मया हरेक विधाय्ल्याय्म्ह पुस्ताया उपस्थिति न्हियान्हिथं ख्वातुयावःगु दु । उकिसनं अभिनय विधाय्ल्याय्म्हतय्गु ल्याः झन्झन् अप्वया वःगु दु ।
थौंकन्हय् खनेदयाच्वंपिं ल्याय्म्ह हिरोतय्गु नां कायेबलय् पल शाह, प्रदीप खड्का व आयुष्मान देसराज जोशीपिनिगु नामय् अप्वःसिया मिखा वनाच्वंगु खनेदु । अथेला आकाश श्रेष्ठ, सुशील श्रेष्ठ, सलिनमान बानिया नं थौंकन्हय् अतिकं बय्बय् जुयाच्वंगु नां खः, तर पल शाह, प्रदीप खड्का व आयुष्मानपिंसंथःथःगु फिल्मं थः छम्ह स्येल्लाःम्ह हिरो खः धकाः क्यने धुंकूगु दु । थ्वझ्वलय् न्हूगु नां कथं अमृत ढुंगानाया नां नं थौंकन्हय् चर्चाय् वयाच्वंगु दु । अमृतं “शायद २”फिल्मय् हास्य अभिनयनिसें कयाः रौद्र रुपया अभिनययानाः आपाःसिया मन त्याकूगु दु ।
फिल्म ख्यलय् खनेदयाच्वंपिं ल्याय्म्ह पुस्ताया हिरोत मध्ये प्रदीप खड्काया चर्चा यायेबलय् वयागु न्हापांगु फिल्म“स्केप”यात छक्वः नं लुमंकेमाः । थ्व फिल्म प्रदिप खड्का थःम्हेसिनं हे लाय् तयाः दयेकूगु फिल्म खः । तर थ्व फिल्म बक्स अफिसय् फ्लप जुल ।फिल्म फ्लप जूसां“स्केप”य् वयागु अभिनय आपाःसिनं ययेकूगु खःसा थ्व हे फिल्म स्वयाः निर्देशक सुदर्शन थापां वयात“प्रेम गीत”या हिरो ल्यल। “प्रेम गीत”या बनेज्या ताःलात। फिल्मी भासं धायेगु खःसा“प्रेम गीत” छगू“सुपर हिट”फिल्म खः । “प्रेम गीत”या सिक्वेल “प्रेम गीत २” या निर्देशक रामशरण पाठक खःसां हिरो धाःसा प्रदीप खड्का हे खः। “प्रेम गीत २” नं हिट फिल्मया हे धलखय् लाःगु फिल्म खः । थुकथं प्रदिपया छगू धुंकाः मेगु फिल्म नं हिट जूगु दु ।
“प्रेमगीत”या निर्देशक सुदर्शन थापां दयेकूगु “म यस्तो गीत गाउँछु” फिल्मय् पल शाहयात हिरो दयेकल । थ्व नं हिट हे फिल्म खः । पल शाहया डेब्यू फिल्म धइगु “नाईं नभन्नु ल ४” खः । पल शाहया“नाईं नभन्नु ल ४” नं “हिट” फिल्म हे खः । तर पल शाहया छगू न्हूगु फिल्म “जोनी जेण्टलमाय्न” धाःसा उलि चले मजुल, अय्सां पल शाहया क्रेज धाःसा म्हो मजूनि ।
पल शाह व प्रदीप खड्का निम्हं अनमोल थें हेतुं रोमान्टिक हिरोया रुपय्न्हाय् धस्वाकेत ताःलाःपिं हिरोत खःसा“चपली हाइट २”या हिरो आयुष्मान देसराज जोशी धाःसा एक्शन हिरोया रुपय् न्ह्यःने वयाच्वंगु दु । “चपली हाइट २” बनेज्याय् लिउने लाःगु फिल्म खःसां वयागु अभिनयया धाःसा आपाःसिनं तारीफ हे याःगु खः ।
थुकथं थःगु पलाः न्ह्याकूम्ह आयुष्मानयालागिं थःहेकिजा आशिरमान देसराज जोशी छगू हाथ्याया रुपय् न्ह्यःने वःगु दु । अनमोललिसे जेरी, होस्टेल व गाजलु थेंज्याःगु स्वंगूसुपर हिट फिल्म दयेकेधुंकूम्ह निर्देशक हेमराज बि.सीं. आशिरमानयात“ग्यांगस्टर ब्लुज”फिल्मय् हिरोया रुपय् काःबलय्आपाःसिनं वयात अनमोलया अल्टरनेटय् वइम्ह हिरो धकाः बय्बय् यात । तर थ्व फिल्म फ्लप जूबलय् धाःसा दक्वसियां म्हुतुप्वाः तित । आयुष्मानया किजा आशिरमानयात निर्माता सुनिल रावलं“शायद २”या लागिंल्यःगु खः । तर अध्ययनय् व्यस्त जुइमाःगु हुनिं “शायद २”फिल्म म्हिते मलात । आशिरमान थेंहेतुं अनमोल के.सी.या विकल्पया रुपय् चर्चाय् वःपिं सुशील श्रेष्ठ व आकाश श्रेष्ठ नं खः । उलिजक मखसे अनमोल के.सी.या मां सुष्मितां दयेकूगु “म त तिमै्र हुँ”फिल्मय् आकाश श्रेष्ठ हे हिरो खःसा “होस्टेल”फिल्मया सिक्वेल “होस्टेल रिटन्र्स”फिल्मय् अनमोलं मम्हितूबलय्सुशील श्रेष्ठयात हिरो दयेकूगु खः ।
आकाश श्रेष्ठ थौंकन्हय्या राईजिंग हिरोइन् साम्राज्ञी राज्य लक्ष्मी शाहलिसे“तिमीसँग”नांयागु फिल्म म्हिताच्वंगु दु । साम्राज्ञीलिसे अभिनय याःगुया कारणं यानाः आकाश श्रेष्ठया चर्चा च्वय् थ्यना च्वंगु दुसा साम्राज्ञीलिसे“ए मेरो हजुर २”फिल्मं कलिउडय् डेब्यू याःम्ह सलिनमान बानियायात नं आपाःसिनं ययेकूगु दु । तर थौंकन्हय् फिल्मपाखे सिबें थःगु हे छगू बनेज्याय् व्यस्त जुयाच्वंगुलिं सलिनं मेगु फिल्म म्हितूगु मदुनि ।
कलिउड धकाः धयातःगु खस नेपाली फिल्मया ल्याय्म्हहिरोतय्गु चर्चा याइबलय् न्ह्यःने वइगु न्हापांगु नां धइगुअनमोलया हे खः । “होस्टेल” फिल्मं अभिनय यात्रा शुरु याःम्ह अनमोलं जेरी, गाजलु व ड्रिम्स नांया फिल्मपाखें ल्याय्म्ह पुस्ता (विशेष यानाःमिस्त) या दर्शक दथुइ दकलय् अप्वः लोकंह्वाःम्ह हिरोया रुपय् थःगु बिस्कं म्हसीका दयेके धुंकूगु दु । अले मेपिंत अनमोल के.सी.या विकल्पया रुपय् जक खंका वयाच्वंगु दु ।
थौंकन्हय् ल्याय्म्ह पुस्ताया कलाकारतय्गु ल्याः झन्झन् अप्वया वयाच्वंगु दु । उकिं भविष्यय् वनाःसु गन थ्यनी धकाः धाये थाकुनि । तर थौंकन्हय् ल्याय्म्ह पुस्ताया दथुइ थःगु बिस्कं म्हसीका दयेकेधुंकूपिं मध्ये सलोन बस्नेत, नाजीर हुसैन, अनुप विक्रम शाही, कर्माया नां नं ल्वःमंके मजिउ ।

सम्बन्धित बुखँ

LEAVE YOUR COMMENTS