अमेरिकी मोडलया प्रशासन

येँ – वर्तमान सरकारं अमेरिकी मोडेलय् राज्यया प्रशासन सञ्चालन यायेगु कथंया प्रतिवेदन लःल्हाःगु दु । एमालेया उपाध्यक्ष वामदेव गौतम नेतृत्वया सुशासन व आर्थिक समृद्धि कार्यदलं तयार याःगु प्रतिवेदनय् उगु सुझाव दुथ्याकातःगु खः । सूत्रं धाः कथं प्रतिवेदनय् न्हापाया सरकारं याःगु फुक्कं राजनीतिक नियुक्ति खारेज यानाः न्हूकथं नियुक्त यायेमाःगु सुझाव नं बियातःगु दु । अमेरिकाय् न्हूम्ह राष्ट्रपति वयेवं न्हापाया सरकारं नियुक्त याःपिं खुद्वःम्ह राजनीतिक नियुक्ति खारेज यायेगु ज्या यानाच्वंगु दु ।

पुलांपिं हे कर्मचारी जुल धाःसा सरकारया ज्यायात ग्वाहालि मयाइगु जुयाः न्हापाया सरकारं यानातःगु राजनीतिक नियुक्ति स्वतः खारेज जुइगु कथं सुझाव बिउगु खँ नं सूत्रं धाःगु दु । थुगु योजनायात मन्त्रिपरिषद्या विशेष कार्यादेश जारी यानाः लागू यायेगु कथं तयारी यानाच्वंगु खँ नं सूत्रं धाःगु दु । कार्यदलं पेश याःगु प्रतिवेदन कार्यान्वयन जुल धाःसा मुख्य सचिव, प्रहरी प्रमुख, अनुसन्धान विभागया प्रमुख, केन्द्रीय बैंकया प्रमुख, थीथी संस्थानया प्रमुख व राजदूतपिं न्हूगु सरकार गठन जुइवं खारेज जुइ ।

सम्बन्धित बुखँ

LEAVE YOUR COMMENTS