ने. सं. ११४४ चौलागा पुन्हि - ल्हुति पुन्हि

ख्वनाय् फास्ट ट्राय्क दयेकेत्यंगु विरुद्ध स्थानीय जनताया प्रदर्शन व सेनालिसे प्रतिकार

यल – थनया ऐतिहासिक नगरी ख्वनाय् फास्ट ट्राय्क दयेकेगु ज्यायात स्थानीय जनतां विरोध याःगु दु । थ्व झ्वलय् स्थानीय जनतां फास्ट ट्राय्क दयेकेगु ज्याया जिम्मा काःगु नेपाली सेनाया जवानतय् विरुद्ध नाराबाजी समेत यायेगु ज्या जूगु दु । फास्ट ट्राय्कया ज्या न्ह्याकेगु लागिं वंगु छुं न्हि न्ह्यवंनिसें अन च्वंगु थीथी लागाय् सेनाया टेन्ट तयेगु ज्या न्ह्यानाच्वंगु दु । थ्व झ्वलय् म्हिगः अन टेन्ट तः वःपिं नेपाली सेनाया विरुद्ध स्थानीय जनतां नाराबाजी यासें ख्वनाया उर्बर भूमि नष्ट यानाः फास्ट ट्राय्क दयेके दइ मखु धकाः विरोध याःगु खः । थ्व विरोधया ज्याय् ‘शेभ नेपाः भ्याली’ अभियानया कार्यकर्तातय्सं नं समर्थन याःगु खः ।फास्ट ट्राय्क दयेकीपिं सैनिकतय्सं म्हिगः थ्व ट्राय्कया अन्तिम विन्दू कथं ख्वनाय् थःपिनि क्याम्प तःगु खः ।

म्हिगः थ्व ज्यायात स्थानीय नेपाल सांस्कृतिक पुनर्जागरण नांगु संस्थां विरोध याःगु खः ।थ्वहे झ्वलय् ख्वनाया मेपिं स्थानीय मनूतय्सं धाःसा लँ दयेकः वःपिं सेनालिसे ल्वाये मफइगु जूगुलिं लिपा थ्व लडाइँयात फासांफुसुं याना छ्वयेगु पलेसा आः हे ख्वनामि जनताया हितय् छु छु सुविधा राज्यपाखें काये फइ उकिया लागिं पहल याये माली धकाः नं सः तया हःगु दु । सेनां कोदुवाः तक ट्राय्क चायेका हयेधुंकूगु जूगुलिं आः उमिसं न्ह्याथे यानाः नं ख्वना कब्जा यायेगु मानसिकता दयेकाच्वंगु खँ नं धया हःगु दु । जग्गा लाःपिं स्थानीय जनतां छुं ई न्ह्यः तिनि जग्गाया मुआब्जा अप्वयेका बी माल धकाः पौ च्वयाः सरकारयात छ्वःगु खः । तर सरकारं उकियात स्पष्ट लिसः बिया महःगुलिं स्थानीय जनता तम्वयाच्वंगु खँ धाःगु दु ।