विश्वकप २०१८

दुनेया सहरी लागाय् चारपांग्रे निषेध

येँ – अन्ततः येँ महानगरया दुनेया लागाय् चारपांग्रे सवारी साधन निषेध याइगु जूगु दु । येँ मनपां थ्व हे वइगु माघ २ गतेनिसें महानगर दुनेया न्हय्गू वडाया सतकय् चारपांग्रे सवारी साधन निषेध यायेत्यंगु खः ।
मनपां आः नकतिनि छगू पत्रकार सम्मेलन यासें स्वनिगःया ऐतिहासिक, पुरातात्विक व सांस्कृतिक सम्पदाया ल्याखं अतिकं महत्वपूर्ण न्हय्गू वडाया सम्पदा संरक्षणया निंतिं उकथं चारपांग्रे सवारी साधन निषेध यायेत्यंगु खः ।
येँ मनपाया १७, १८, १९, २२, २४, २५ व २७ वडा दुनेया सहरी लागा जूगुलिं उगु क्षेत्रय् च्वंगु सम्पदाया संरक्षणया निंतिं चारपांग्रे सवारी साधन निषेध यायेमाःगु आवश्यक दुगु मनपाया उपप्रमुख हरिप्रभा श्रष्ठ खड्गीं पत्रकार सम्मेलनय् जानकारी बियादीगु दु ।
मनपां सम्पदा संरक्षणया निंतिं सुथसिया ७ ताः इलंनिसें बहनिसिया ७ ताः ईतक दुनेया सहरी लागाया सतकय् उकथं चारपांग्रे सवारी साधन चले यायेगुलिइ निषेध यायेत्यनागु जानकारी बिउगु दु ।
चारपांग्रे सवारीया कारणं महानगर दुनेया सहरी लागाय् लँजुवाः व अनया सम्पदा अवलोकन यायेत वइपिं पर्यटकतय्सं तकं तसकं सास्ति फयेमाःगुलिं चारपांग्रे सवारी निषेध यायेत्यनागु महानगरीय ट्राफिक प्रहरी महाशाखाया ट्राफिक प्रहरी निरीक्षक विदुर थापां कनादीगु दु । अत्यावश्यकीय सवारीयात धाःसा निषेध मयाइगु जूगु दु ।

सम्बन्धित बुखँ

LEAVE YOUR COMMENTS