बाग्लुङय् परम्परागत शैलीं होलि

येँ – बाग्लुङय् च्वंपिं नेवाःतय्सं नं थुगुसी न्ह्यइपुक होलि माने याःगु दु । नेपालभाषा मंकाः खलः, बाग्लुङया ग्वसालय् पुलांगु हे विधि, शैली व स्वरुपय् होली न्यायेकाः परम्परागत शैलीयात पुनर्जागरण याःगु खः । स्वसः दँ पुलांगु बाग्लुङया होलिया इतिहासयात पुनर्जागरण यायेगु ल्याखं खलकं उकथं होलि न्यायेकूगु खः । खलःया नायः मुकेशचन्द्र राजभण्डारीं लोप जुया वनेत्यंगु परम्परागत होलिया मौलिकतायात ल्यंकेगु उद्देश्यं उकथं होलि न्यायेकागु धयादिल । वय्कलं धयादी, ‘पुलांगु पुस्तां न्यायेका वयाच्वं थें हे दुरुस्त होलि न्यायेके मफुसां पहिचानयात कायम यायेगु कुतः धाःसा जूगु दु ।’

अथे हे स्थानीय संस्कृतिकर्मि प्रेम छोटां खलःया न्हूगु नेतृत्वं होलियात व्यवस्थित व संस्थागत यायेगु निंतिं गुगु कुतः न्ह्याकल व च्वछायेबह जू धयादिल । ‘होलिपुन्हिया थःगु हे महत्व दु । थःगु हे पन दु । उकिं थुकिया संरक्षण यायेमाः’, प्रेम छोटां धयादिल, ‘थौंकन्हय् थन होलिया इलय् हालिगु म्येँया मौलिकता तना वने धुंकूगु दु । आः पुस्तां उकियात हालेगु कुतः याःसां उकिया मर्म धाःसा ल्यं फयाच्वंगु मदु । यद्यपि गुगु कुतः जुल व बांलाःगु पक्ष खः ।’

थौंया इलय् आधुनिक व पाश्चात्य संस्कृतिं हा कया वनाच्वंगुलिं परम्परा कायम यायेत थाकुया वनाच्वंगु इलय् उकिया ल्यंकेया निंतिं गुगु कुतः जुल व हे तःधंगु उपलब्धि जूगु वय्कःया धापू दु । खलःया आह्वानय् थुगुसी होलिया म्येँ हालाः स्थानीयवासीं नगर परिक्रमा याःगु खः । बाग्लुङय् होलिया इलय् पुजा याइम्ह द्यःया पुजा यायेगु, भोग बीगु नापं होलिया म्येँ हालाः नगर परिक्रमा यायेगु चलन दुगु खःसां लिपांगु इलय् थ्व चलन तना वनाच्वंगु दु ।

सम्बन्धित बुखँ

LEAVE YOUR COMMENTS