प्रमाणपत्र बरः कयाः त्यासा बीगु

येँ – वइगु वैशाखंनिसें उद्योग चायेकेगु निंतिं शैक्षिक प्रमाणपत्र बरः तयाः त्यासा काये फइगु जूगु दु । युवा तथा खेलकुद मन्त्रालयं शिक्षित युवातय्त थुकथं त्यासा बीगु तयारी यानाच्वंगु खः । सरकारं मास्टर्स तहया शैक्षिक प्रमाणपत्र बरः तयाः त्यासा बीगु तयारी याःगु खः । त्यासा कायेगु निंतिं सम्बन्धित विद्यार्थीं थःम्हेस्यां लगानी यायेत्यनागु ज्याया योजना पेश यायेमाः धाःगु दु ।

सरकारं न्हापा नं विदेशय् पिहां वनाच्वंपिं ल्याय्म्हतय्त लक्षित यानाः शैक्षिक प्रमाणपत्र बरः तयाः त्यासा बीगु धकाः धायेगु यानाच्वंगु खःसां उगु ज्या धाःसा पूमवनाच्वंगु खः । आः थ्व ज्या न्ह्याकेगु कथं तयारी जुयाच्वंगु खँ धाःगु दु । थुकिया निंतिं माःगु कार्यविधि तयार यायेगु ज्या जुयाच्वंगु खँ मन्त्रालयं धाःगु दु ।

सरकारं छम्ह विद्यार्थीयात ब्याज मकासे छगू लाख निसें स्वंगू लाख तक त्यासा बीगु तयारी यानाच्वंगु दु । त्यासाया निंतिं वःगु प्रस्तावयात थीथी समितिं अनुमोदन यानाः जक उगु त्यासा बीगु खँ धाःगु दु । त्यासाया निंतिं सरकारं स्थानीय स्रोत साधन छ्यलीगु उद्योगयात न्हापांगु प्राथमिकताय् तइगु खँ दु ।

सम्बन्धित बुखँ

LEAVE YOUR COMMENTS