भवन निर्माणय् सहुलियत बीत मनपा तयार

येँ महानगरपालिकां सुरक्षित भवन निर्माणया निंतिं सहुलियत बीगु जूगु दु । येँ मपा प्रमुख विद्यासुन्दर शाक्यं नागरिकयात सुरक्षित भवन निर्माण याइगु इलय् लागत बराबरया सहुलियत बियाः प्रोत्साहन बीत थः तयार दुगु खँ धयादीगु खः ।
महानगर प्रमुख शाक्यं भूकम्प सुरक्षा दिवस व्यवस्थापन समितिया छगू बैठकय् उगु खँ धयादीगु खः । वय्कलं सुरक्षित भजन निर्माण याइगु इलय् लागत बराबरया सहुलियत बियाः नागरिकयात प्रोत्साहन यायेगु नीतिइ थः प्रतिवद्ध दुगु खँ धयादीगु खः ।
वय्कलं विगतया पाठ सयेकाः नागरिकं नं सुरक्षित भवन निर्माण यायेमाःगु अति आवश्यक जूगु खँय् बः बियादिल । लिसें वय्कलं सुरक्षित भवन निर्माणया निंतिं महानगरपालिकां नं फक्व ग्वाहालि यायेगु प्रतिवद्धता प्वंकादीगु खः ।
वइगु माघ २ गते २० क्वःगु भूकम्प सुरक्षा दिवसया न्हिकुन्हु थनया भूगोल पार्कय् ११ ताः इलय् छगू स्मृति सभा यायेगु निर्णय नं उगु बैठकं याःगु दु । उकुन्हु हे न्हिनसिया १२ ताः इलय् जुद्ध शालिक न्हूसतकं छगू ¥याली नं पिथनीगु जूगु दु । उगु ¥याली जुद्ध शालिकं शुरु यानाः ओमबहाः, लगं, ब्रह्मत्वाः, हिउमत, जैसीदेगः, क्वहिति, भिंद्यः त्वाः, मरुसतः, यतखा, न्यत, किलाघः भ्याःचाद्यः, वंघः जुयाः बसन्तपुलिइ थ्यंकाः क्वचायेकेगु ज्याझ्वः तयातःगु दु ।
महानगर दुनेया सहरी क्षेत्रया करिब स्वंगू किलोमीटर परिक्रमा यानाः न्हिनसिया १ ताः इलय् बसन्तपूस्थित जुद्ध बारुण यन्त्र न्ह्यःने छगू मूल समारोह याइगु जूगु दु । थुगुसीया राष्ट्रिय भूकम्प सुरक्षा दिवसया निंतिं ‘सबल समुदाय व स्थानीय सरकार, भूकम्पीय सुरक्षाया बल्लाःगु आधार’ धइगु नारा बियातःगु दु ।
दिवसया निंतिं येँ महानगरपालिकाया प्रमुख संयोजकत्वय् व्यवस्थापन उपसमिति व सहरी विकास तथा भवन निर्माण विभागया महानिर्देशकया संयोजकत्वय् प्रचार प्रसार समिति गठन याःगु दु ।

सम्बन्धित बुखँ

LEAVE YOUR COMMENTS