संघीय संसदय् नेवाः भासं छम्हेसिनं जक सपथ ग्रहण याइगु

४४ म्हेसिनं मांभासं सपथ ग्रहण

येँ – संघीय संसदया सांसदतय्त थौं न्हिनय् ४ बजे सपथ ग्रहण याकेत्यंगु दु । थ्व सपथ ग्रहणय् ४४ म्ह सांसदतय्सं थःथःपिनिगु मांभासं शपथ ग्रहण यायेत्यंगु दुसा थुकी नेवाःभासं छम्ह हे जक सांसदं सपथ ग्रहण याइगु जूगु दुु ।

संसद सचिवालयं मांभासं सपथ ग्रहण यायेगु निंतिं स्वन्हु न्ह्यव हे जानकारी बीत धाःकथं ४४ म्हेसिनं थीथी झिगू मांभासं शपथ ग्रहण यायेत जानकारी बिउगु खः । थुकी नेवाःभासं सपथ ग्रहण यायेगु निंतिं संघीय समाजवादी फोरमया समानुपातिक पाखें वंम्ह सांसद राजेन्द्र श्रेष्ठ छम्हेसिनं नेवाः भासं सपथ ग्रहण यायेगु जानकारी बिउगु खः ।

राष्ट्रिय सभा व प्रतिनिधि सभाया मंकाः संसदयात संघीय संसद धाइ । थौं राष्ट्रिय सभा व प्रतिनिधि सभाया सांसदतय्त मंकाः कथं सपथ ग्रहण याकेत्यंगु खः ।
प्रतिनिधि सभाय् जक प्रत्यक्षपाखें येँ व यलं जक खुम्ह नेवाः सांसदत त्याःगु दु । नेवाः ख्यलय् सक्रियपिं भिमसेनदास प्रधान, रामवीर मानन्धर, जीवनराम श्रेष्ठ, कृष्ण गोपाल श्रेष्ठया लिसें प्रकाशमान श्रेष्ठ येँ नं त्याःपिं खःसा यलपाखें कृष्णलाल महर्जन त्याःगु खः ।

अथेहे समानुपातिकपाखें प्रधानमन्त्री केपी ओलीया जहान सुजिता शाक्य लिसें न्याम्ह नेवाः सांसदत दुसा राष्ट्रिय सभाय् निम्ह जक नेवाः थरयापिं सांसदत दु ।
थौं नेवाः भाय् लिसें मैथिली, भोजपुरी, थारु, मगर, अवधि, बज्जीका, नेवाः, हिन्दी, उर्दू व तामाङ भासं सपथ ग्रहण यायेत्यंगु खः ।

सम्बन्धित बुखँ

LEAVE YOUR COMMENTS