ने. सं. ११४४ चौलागा पारू -

पुरातत्व विभागं डिजाइन मबिउगुलिं न्हूपुखूया ज्या ठप्प

येँ–पुरातत्व विभागं डिजाइन छ्वया मबीवं न्हूपुखू पुनःनिर्माणया ज्या थातिं लानाच्वंगु दु । न्हूपुखू पुनःनिर्माणया निंतिं पुरातत्व विभागं डिजाइन छ्वया हयेमाःगु खःसा विभागं डिजाइन छ्वया मबिउगुलिं पुनःनिर्माणया ज्या न्ह्याये फयाच्वंगु मदु ।
येँ महानगरपालिकां निर्माण यानाच्वंगु न्हूपुखू पुनःनिर्माणय् आधुनिक ज्वलं छ्यःगु धासें सम्पदाप्रेमीतय्सं चिउताः प्वंकेवं पुनःनिर्माण हे विवादय् लानाच्वंगु खः । न्हूपुखू प्रताप मल्लकालीन शैलीं हे पुनःनिर्माण जुइमाः धइगु खँय् व्यापक रुपं सः थ्वयाच्वंगु दु ।
मनपाया कार्यकारी प्रमुख धनीराम शर्मां विभागं आतक नं डिजाइन छ्वया महःगुलिं पुनःनिर्माणया ज्या हाकनं न्ह्याके मफयाच्वंगु धयादिल । वय्कलं थ्व स्वयां न्ह्यः यानागु सम्झौताकथं पुखूया दथुइ च्वंगु बालगोपालेश्वर देगः विभाग व पुखूया मेमेगु भाग मनपां निर्माण यायेगु धाःसां नं लिपांगु इलय् दक्वं डिजाइन विभागं हे छ्वया हयेगु निर्णय जूगु व व हे कथं पुनःनिर्माणया ज्या हाकनं न्ह्याकेत डिजाइन पियाच्वनागु तर, डिजाइन मदुगुलिं यानाः ज्या न्ह्याके मफयाच्वंगु धयादिल ।
उखे विभागया प्रवक्ता रामबहादुर कुँवरं देगःया पुनः निर्माण न्हापाया हे डिजाइन कथं जुइगु व मेमेगु पःखाः व पुखूया डिजाइनयात कयाः सहलह जुयाच्वंगु धयादीगु दु ।
२०७२ साल बैशाख १२ गतेया विनाशकारी तःभुखाचं क्षति जूगु न्हूपुखू पुनःनिर्माणया सम्बन्धय् ताःई न्ह्यवंनिसें विवाद पिहां वयाच्वंगु दु । मनपां दयेकेगु धाःगु पुखू जक मखसे पुखूया दथुइ च्वंगु देगलय् तकं सिमेन्ट, डन्डी लगायत आधुनिक निर्माण सामग्री छ्यलाः पुनःनिर्माण याःगु धासें सम्पदाप्रेमीतय्सं उकियात कयाः विरोध याना वयाच्वंगु खःसा पुलांगु हे शैली व सामग्री छ्यलाः पुनःनिर्माण यायेमाःगु खँय् इमिसं बः बियावयाच्वंगु दु ।
थ्व हे विवादया दथुइ नं लिपांगु इलय् विभाग व मनपा दथुइ आन्तरिक विवाद जुइवं वंगु पुस १३ गते विभागया पुलांम्ह महानिर्देशक विष्णुराज कार्कीया संयोजकत्वय् झिंस्वम्हेसिया छगू विज्ञ समूह गठन याःगु खः । उगु समूह नं वंगु माघ ७ गते थःपिनिगु प्रतिवेदन नं बुझे याये धुंकूगु दु । पुस ९ गते निसें पुनःनिर्माणया ज्या ठप्प जुयाच्वंगु दु ।