एमाले–ससफो सहमतिइ छु दु ?

येँ – समाजवादी फोरमयात नं सरकारय् दुकायेगु लागिं वाम गठबन्धन व ससफोया कार्यदलं सहमतिया दस्तावेज तयार याःगु दु । थ्व सहमतिइ संसफोपाखें न्हापा थीथी इलय् याःगु आन्दोलनय् ल्ह्वना–च्वंगु मागयात वर्तमान सरकारं पूवंकेगु खँ दुथ्याः ।
फोरमं ल्ह्वनाच्वंगु माग मध्ये संविधान संशोधनलिसे सम्बन्धित मागयात संविधान संशोधन मार्फत हे सम्बोधन यायेगु व मेमेगु मुद्दायात सरकारया नीति तथा कार्यक्रम मार्फत सम्बोधन यायेगु सहमति जूगु खँ कार्यदलय् दुथ्याःपिं नेतातय्सं धाःगु दु । थ्व सहमति एमालेपाखें सुवास नेम्बाङ नेतृत्वया कार्यदल व फोरमपाखें राजेन्द्र श्रेष्ठ नेतृत्वया कार्यदलं तयार याःगु खः ।

थ्व मागयात पूवंकेगु लागिं आन्तरिक गृहकार्य यायां वनेगु व उकिया लागिं स्वंगुलिं पार्टीया प्रतिनिधित दुथ्याःगु संयन्त्र दयेकाः न्ह्याः वनेगु सहमति नं जूगु दु । कार्यदलया थ्व सहमतिइ शीर्ष नेतातय्गु स्वीकृति कायेत म्हिगः संसफो नेतात वालुवाटार वंगु खःसां मन्त्रि–परिषद्या बैठक क्वमचायाः प्रधानमन्त्री मवःगुलिं लिपा सकलें सिंहदरवार हे वनाः वार्ता याःगु खः ।थ्व सहमति क्वचाल कि संसफो नं सरकारय् समावेश जुइ ।

आः धाथेंया वाम गठबन्धन !

एमाले व माओवादी निगू वाम पार्टी जानाः गठन यानातःगु वाम गठबन्धनय् संघीय समाजवादी फोरम नं समावेश जुइत अःपूवंगुया छता मू कारण संसफो थः हे नं वामपन्थी पृष्ठभूमि दुपिं नेता कार्यकर्ताया पार्टी जूगुलिं खः । संसफोया अध्यक्ष उपेन्द्र यादव पुलांम्ह माओवादी कार्यकर्ता खःसा सहअध्यक्ष राजेन्द्र श्रेष्ठ पुलांम्ह एमाले नेता खः । थ्व पार्टीया मू राज–नीतिक सिद्धान्त नं ‘समाजवाद’ हे खः। एमाले व माओवादीलिसे फोरम नं सहभागी जूगुलिं आः सत्ताय् वामतय् दुई तिहाई बहुमत खाःगु दु ।

सम्बन्धित बुखँ

LEAVE YOUR COMMENTS