रहस्यमय मृत्यु जूपिं हस्ती

बलिउड अभिनेत्री श्रीदेवी कपुरया रहस्यमय व अप्रत्याशित मृत्यु लिपा बलिउड आः छगू कथं अथे हे रहस्यमय व अप्रत्यशित रुपं सीपिं कलाकारफिल्मकर्मीयात कयाः चर्चा जुयाच्वंगु दु । श्रीदेवीया अप्रत्याशित मृत्युलिपा बलिउडया मेपिं चर्चित नायक, नायिका, फिल्म निर्माता, निर्देशकया मृत्युया घटनायात कयाः चर्चा–परिचर्चा जूगु खः । थ्व झ्वलय् ९० या दशकय् चर्चाया शिखरय् दुम्ह दिव्या भारती, अमर अबर एन्थोनी, कुली, धरमवीर थेंज्याःगु क्लासिक फिल्मया निर्देशक मनमोहन देसाई, अभिनेत्री जिया खान, अभिनेता, निर्देशक व निर्माता गुरु दत्त, परवीन बबी आदिया रहस्यमय व अप्रत्याशित मुत्युयात कयाः चर्चा जुयाच्वंगु दु ।

थुपिं मध्ये परवीन बबीया मृत्युया घटनायात काः बलिउडय् आतक नं अनेककथंया खँ इलय्व्यलय् पिहां वयाच्वंगु दु । मेखे ९० या दशकय् बलिउडय् चर्चाया शिखरय् वयाच्वंम्ह दिव्या मदुगु घटना नं चर्चाय् वयेगु याः । थःगु हे अपार्टमेन्टया न्यातँजालं कुतुं वयाः मदुगु खः । वयागु मृत्युयात कयाः प्रहरीं छानविनया झ्वलय् वं आत्महत्या याःगु धाःसां वयाः हे भाःत साजिद नाडियादवालायात मनूतय्सं आतक नं शंका यानाच्वंगु दु ।