‘सछिन्हु लिपा प्रदेशया राजधानी सरे जुइ’

येँ – ३ नम्बर प्रदेशया भौतिक पूर्वाधार मन्त्री केशव स्थापितं थौंकन्हय् हेटौंडाय् तयातःगु प्रदेशया राजधानी अनं मेथाय् सरे जुइगु खँ कनादीगु दु । थौंकन्हय् प्रदेश सरकारयात माःगु कानून व कार्यविधि दयेकेगु ज्याय् थःपिं व्यस्त जुयाच्वनागु धासें सछिन्हु लिपा राजधानी नं सरे यानाः मेथाय् तये यंकेगु जुइ धयादिल । सञ्चारकर्मीतलिसे खँ ल्हासें वय्कलं थ्व खँ कनादीगु खः ।

हेटौंडायात दोल्खा, रामेछाप, रसुवा, नुवाकोट आदि जिल्लाया सांसदतय्सं थःपिनि लागिं पायक मजुल धासें राजधानी अनं मेथाय् सरे यायेत माग यानाच्वंगु दु । हेटौंडानिवासी मुख्यमन्त्री डोरमणि पौडेलं धाःसा राजधानी मेथाय् सरे जुइ मखु धकाः आश्वासन बीगु यानादीगु दु ।

तर पूर्वाधार मन्त्री स्थापितं न्हूगु राजधानीइ आवश्यक पूर्वाधार तयार यायेगु जिम्मा भौतिक पूर्वाधार मन्त्रीया ल्याखं थःत हे बियातःगु दावी नं यानादिल । थ्व प्रदेशया नामाकरण यायेगु ज्या नं न्हूगु राजधानीइ सरे जुइधुंकाः हे जक जुइगु खँ नं वय्कलं कनादिल । हेटौंडाय् सरे जुइगु राजधानी गन च्वनी धइगु खँ धाःसा वय्कलं कनामदी । आः हे राजधानी जुइगु थाय्या नां कन धाःसा अन जग्गा दलाल सक्रिय जुयाः चौपट याना बी धासें नां लिपा जक कनेगु खँ नं धयादिल ।

सम्बन्धित बुखँ

LEAVE YOUR COMMENTS