ने. सं. ११४४ चौलाथ्व द्वादशी -

तःभुखाय् लिपा पहिचानया संकट

येँ – भुखाचं पीडित जूपिं रसुवाया तामाङत च्वनेगु छेँ मदयाः उखेंथुखें च्वं वनेमाःगु कारणं यानाः उमिगु परम्परागत संस्कृति व संस्कार हे तना वनीगु खतरा पिहां वःगु खँय् चिउताः प्वंका हःगु दु । रसुवाया हाकुवाडा, खाल्तिबजार, बगाले आदि लागाय् च्वंपिं स्थानीय वासिन्दात भुखाय् लिपा छेँ दुना वंगुलिं थौंकन्हय् मूल वासस्थान त्वःताः उखें थुखें च्वं वनाच्वंगु दु । लिसें सरकारं नं आः उमित थौंकन्हय् गन गन च्वनाच्वंगु खः अन अन हे टहरा दयेकाः च्वनेगु व्यवस्था यायेत्यंगु दु । तर थथे यायेबलय् थःपिं याकःबाकः लानाः थःपिनि सामाजिक जीवन प्रभावित जुइगु व मौलिक संस्कृति व संस्कार ला तना हे वनीगु खतरा दुगु खँ सम्बन्धित पीडिततय्सं धया हःगु दु ।

थ्व अवस्था मवयेकेगु लागिं थःपिंत एकीकृत रुपं हे च्वनेगु व्यवस्था याना बिउसा जिउगु बिचाः उमिसं तया हःगु दु । न्हापा नं झुरुप्प धायेक छगू हे थासय् च्वंच्वनागु जुयाः आः नं उकथं हे छथासं तुं च्वने दःसा जिउ धइगु माग उमिसं यानाच्वंगु दु । सरकारं बीगु अनुदान कयाः छेँ दनेबलय् याकःबाकः लाः वनीगु सम्भावना दुगुलिं न्ह्यथाय् जूसां एकीकृत रुपं हे च्वनेगु व्यवस्था याना बिउसा बांलाइगु बिचाः उमिसं तया हःगु दु । सरकारया अनुदान कयाः गन न्ह्याः अन छेँ दं वनेबलय् थःपिनि सामाजिक व सांस्कृतिक जीवन प्रभावित जुइगु खँ नं उमिसं धाःगु दु ।

तर सरकारं धाःसा उगु लागाया सकलें स्थानीयवासीयात एकीकृत रुपं छथासं तयेगु लागिं जग्गाया समस्या दुगु खँ धाःगु दु । उलिमछि मनूत तयेगु लागिं तकूगु जग्गाया अभाव दुगु जुयाः स्थानीय तामाङ जातिया माग कथं एकीकृत रुपं तयेत समस्या दुगु खँ सरकारं धाःगु दु । अथे खःसां जग्गा गन दइ धकाः मालेगु ज्या जुयाच्वंगु खँ नं धाःगु दु ।