ओली सरकारय् छम्ह नं नेवाः दुमथ्याइगु

येँ- केपी ओलीया नेतृत्वय् दुगु वामगठबन्धनया सरकारया मन्त्रिमण्डलय् छम्ह नं नेवाः मलाइगु जूगु दु । प्रधानमन्त्री ओलीं थौं माओवादी केन्द्रया मन्त्रीत सहित मन्त्रिमण्डल विस्तार यायेत्यंगु दु । न्हूगु मन्त्रिमण्डलय् वनीपिं सम्भावित मन्त्रीत छम्ह नं नेवाः लाःगु मदु । एमालेपाखें जक मखु, माओवादी केन्द्रपाखें नं छम्ह नं नेवाः मन्त्री जुइत्यंगु मदु ।

न्हूगु मन्त्रिमण्डलय् एमालेपाखें आःयात ईश्वर पोखरेल, प्रदीप ज्ञवाली, योगेश भट्टराई, रविन्द्र अधिकारी, रघुवीर महासेठ, हृदयश त्रिपाठी व नारदमुनि राना वनीगु खँ धाःगु दु । एमालेपाखें मन्त्री जुइत्यंम्ह हृदयश त्रिपाठी वंगु प्रतिनिधिसभा चुनावय् सूद्र्यः चिं कयाः चुनाव ल्वाःम्ह खः ।
अथेहे माओवादी पाखें रामबहादुर थापाया नेतृत्वय् वर्षमान पुन, शक्तिबहादुर बस्नेत, मातृका यादव, गिरिराजमणि पाखेरेल व वीना मगर सरकारय् वनी ।

एमाले व माओवादीं सरकारय् वनीपिनि नां क्वःछिइ धुंकूसां सुयात छु मन्त्रालय बीगु धयागु धाःसा क्वःमछिउनिगु खँ धाःगु दु । थौं न्हिनय् दुने मन्त्रालय क्वःछिइ धुंकाः सनिलय् दुने शपथ ग्रहण याकेगु तयारी जुयाच्वंगु दु ।

ओली प्रधानमन्त्री जुयादीबलय् एमालेपाखें लालबाबु पण्डित व थममाया थापा मन्त्री जुयादीधुंकूगु दु ।

सम्बन्धित बुखँ

LEAVE YOUR COMMENTS