विश्वकप २०१८

छिन्ताङय् सीपिं शहीद घोषणा

प्रदेश प्रमुख नियुक्त यायेगु ज्या थौं नं मजुल

येँ: नेपाःया राजनीतिइ अतिकं चर्चाय् वइगु ‘छिन्ताङ काण्ड’ या सकलें मृतकतय्त शहीद घोषणा याःगु दु ।
धनकुटाया छिन्ताङ गामय् थनिं ३८ दँ न्ह्यः जूगु थ्व काण्डय् तत्कालिन प्रहरीं गोलीं कयेकूबलय् १६ म्ह स्थानीय मनूतय् ज्यान वंगु खः । उकी लानाः सीपिं सकसितं आः वयाः शहीद घोषणा यायेगु निर्णय याःगु खः । थौं च्वंगु मन्त्रिपरिषद् बैठकं छिन्ताङ काण्डय् सीपिं सकसितं शहीद घोषणा यायेगु निर्णय याःगु खः ।
वि.सं. २०३६ साल कार्तिक २७ गते छिन्ताङ गामय् तत्कालिन नेकपा (माले) या भूमिगत गतिविधि नियन्त्रण यायेगु नामय् प्रहरीं गोली चले याःबलय् १६ म्ह मनूत छथाय् हे सीगु खः ।
तत्कालिन प्रधानमन्त्री सूर्यबहादुर थापां अन गोली चले यायेगु निर्देशन बिउगु द्वपं वामपन्थी नेतातय्सं बीगु याना वयाच्वंगु दु ।
मन्त्रिपरिषद्या थौं च्वनीगु बैठकं न्हय्गुलिं प्रदेशया प्रमुखत तोके यायेगु जुइ धकाः सरकारं जानकारी बिउगु खःसां प्रदेश प्रमुख तोके यायेगु ज्या धाःसा याये मफुत । थौं सरकारं प्रदेश प्रमुख व अस्थायी केन्द्र तोके यायेगु धाःगु खः ।
प्रदेश प्रमुख नियुक्त यायेगु ज्या मजूगुलिं प्रदेशपाखेया चुनावया लिच्वः बुझे यायेगु ज्या अझ लिहां वनीगु अनुमान याःगु दु । निर्वाचन आयोगं केन्द्रया लिच्वः राष्ट्रपतियात बुझे याःसां प्रदेशया लिच्वः धाःसा प्रदेश प्रमुखयात बुझे यायेगु प्रावधान दु ।
थ्व बाहेक थौंया मन्त्रिपरिषद् बैठकं नेपाली सेनाया उपरथी गौरव तन्डुलयात रथी पदय् बढुवा यानाः युएन फोर्स कमाण्डरय् छ्वयेगु निर्णय याःगु दुसा उपरथी ज्ञानेन्द्रलाल महर्जनयात सहायक रथी पदय् बढुवा यायेगु निर्णय नं याःगु दु । लिसें विश्व बैंकं बीगु ८ अर्ब तकाया त्यासा नं स्वीकार यायेगु निर्णय याःगु दु ।

सम्बन्धित बुखँ

LEAVE YOUR COMMENTS