स्वारेजया ह्याट्रिकय् बार्सिलोना त्यात

लुइस स्वारेजया ह्याट्रिकया ग्वाहालिं बार्सिलोनां थःगु शहरी प्रतिद्वन्द्वी गिरोनायात ६–१ गोलं बुकूगु दु । कासाया स्वंगूगु मिनेटय् हे पोर्चुगिज मान्जानेरां बार्सायात स्तब्ध यासें गिरोनाया निंतिं न्हापांगु गोल यःगु खः । तर थ्वयां निगू मिनेट लिपा हे लियोनल मेसीं कासा बराबरी यायेगु निंतिं स्वारेजयात गोलया ह्वःताः चूलाकाबिल । स्वारेजया मेगु छगू गोलया निंतिं फिलिप काउन्टिन्हों बल मिले यानाबिलसा ह्याट्रिकया निंतिं ओउस्माने डेम्बेलें क्रस बिउगु खः । मेस्सी थःम्हं हे नं निगू गोल याःगु खःसा थप छगू गोल ओउस्मानें याःगु खः ।

थ्व विजय लिपा बार्सा १० अंकया अग्रता सहित ला लिगया शीर्षस्थानय् हे दु । थुकि लिसें बार्सां ला लिगा निगू सिजन दुने झ्वःलाक्क ३२ गू कासाय् अपराजित यात्रा यासें क्लब रेकर्ड नं तःगु दु ।

ला लिगाया आः वइगु झिंस्वंगू कासाय् नं अपराजित यात्रा कायम यायेफत धाःसा बार्सिलोना सन् १९३० लिपा छगू सिजनय् छगू हे कासा मबूगु टिम जुइ ।
मेखे ला लिगाया मेगु कासाय् रियल म्याड्रिडं अल्भासयात ४–० गोलं बुकल । रियलया निंतिं रोनाल्डों निगू, गारेथ बेल व करिम बेन्जमां छगू छगू गोल याःगु खः ।

थ्व विजय लिपा रियल ल्याः धलखय् स्वंगूगु थासय् दु । तर शीर्षस्थानय् लानाच्वंगु बार्सा स्वयां १४ अंकं लिउने दु । बार्साया आः ६५ ल्याः दुसा निगूगु थासय् लानाच्वंगु एथलेटिको म्याड्रिडया ५५, रियलया ५१ अंक दु ।

सम्बन्धित बुखँ

LEAVE YOUR COMMENTS