पुरातत्वं पना बिल लानिपुखू ,शैली बारे मेयर व उपमेयरया बिचाः समेत पात

येँ – लानिपुखू न्हूगु अथवा पुलांगु छु शैलीं दयेकेगु धइगु खँय् निर्णय जुइ मफयाः आः तक पुनर्निर्माणया छुं हे ज्या न्ह्याः मवंनिगु खँ सीदुगु दु ।
येँ मनपां पुलांगु शैलीं दनेमाः धयाच्वंगु पुरातत्व विभागं वर्तमान शैलीं हे दयेमाः धयाच्वंगु कारणं आः तक थ्व ज्या न्ह्यायेमफुगु खँ मनपा सूत्रं धाःगु दु । पुलांगु ग्रन्थकुट शैलीं (शिखर शैली) दयेकेगु कि गुम्बज शैलीं दयेकेगु धइगु बारे आः तक पुरातत्व विभागं निर्णय याना बिउगु मदुनि ।
प्रताप मल्लकालीन शैलीं दयेकेमाः धकाः विज्ञ पुचलं सुझाव बिउसां पुरातत्वया कर्मचारीतय्सं उकियात पाय्छि मजू धासें आःयागु गुम्बज शैलीं दयकेगु खःसा थःपिं तयार दु धकाः धायेगु यानाच्वंगु खँ मनपा सूत्रं धाःगु दु ।

सूत्रया कथं पुरातत्वया थ्व प्रस्तावयात मेयर विद्यासुन्दर शाक्यं नं अस्वीकार यानादीगु दु । वय्कलं विज्ञ पुचलं बिउगु सुझाव कथं हे लानिपुखू दयेकेमाःगु अडान कयादीगु दु । थ्वहे विवादया कारणं मेखे मेयर व उपमेयर हरिप्रभा खड्गी दथुइ हे खँ पाना वंगु संकेत नं वःगु दु । मेयर खड्गीं आः पुलांगु हे शैलीं दयेकेबलय् आपालं समस्या दुगु खँ कनादिसें झीसं आः गुगु देगः स्वयाच्वनागु खः उगु हे शैलीं दयेकाः जूसां नं लानिपुखू ल्यंकेमाःगु बिचाः प्वंकादीगु दु । वय्कलं धयादी, ‘प्रताप मल्लकालीन दयेकेगु निंतिं इतिहासया आपालं खँ माले माली, छम्ह विदेशीं च्वःगु स्केचया भरय् दयेकेत थाकुइफु ।’

तर विज्ञ पुचलं थःपिनिगु प्रतिवेदन लःल्हायेगु झ्वलय् पुचःया संयोजक विश्वराज कार्कीं थःपिंत जिम्मेवारी बिल धाःसा पुलांगु हे शैलीं दयेका बी धकाः दावी यानादीगु खः । सूत्रया कथं पुरातत्व विभागं गुम्बज शैलीं हे देगः दयेकेगु कथं टेन्डर आह्वान यानाः ज्या तकं न्ह्यायेधुंकूगुलिं उगु हे शैलीं दयेकेमाः धयाच्वंगु खः । उकी विभागया छपुचः कर्मचारी नं लगे जुयाच्वंगु दु । अबले टेन्डर बिउबलय् आर्थिक चलखेल समेत जूगुलिं उकियात हिलेत पुरातत्वया कर्मचारीत तयार मजूगु आशंका सूत्रं याःगु दु । लानिपुखूया उगु देगः सिमेन्ट व डण्डी छ्यलाः दनेवं स्थानीय जनतां विरोध याःगु खःसा वयां लिपा येँ मनपां विज्ञ पुचः दयेकाः निर्णय याके बिउगु खः । विज्ञ पुचलं बिउगु सुझावय् मेयर सहमत दुसां पुरातत्वं धाःसा विरोध विरोध यानाच्वंगु दु ।

सम्बन्धित बुखँ

LEAVE YOUR COMMENTS