विश्वकप २०१८

सरकारी संस्थानया खाता राष्ट्र बैंक बन्द याइगु

येँ – नेपाल राष्ट्र बैंकं थीथी सरकारी संस्थानं चायेकातःगु खाता बन्द यायेगु तयारी याःगु दु । सरकारी संस्थानं राष्ट्र बैंकय् चायेकातःगु खाता बन्द यानाः बाणिज्य बैंकय् स्थानान्तरण यायेगु तयारी राष्ट्र बैंकं याःगु खः । राष्ट्र बैकय् चायेकातःगु खाता बन्द यानाः वाणिज्य बैंकय् सरकारी संस्थानया ध्यबा बाणिज्य बैंकय् तल धाःसा थुकिं बैंकिङ क्षेत्रय् खनेदुगु तरलता नं म्हो जुइगु विश्वास राष्ट्र बैंकं याःगु दु । सरकारी संस्थानं राष्ट्र बैंकय् चायेकातःगु खाताय् जक ११ अर्ब ३३ करोड ५० लाख तका दु । उगु ध्यबा आः राष्ट्र बैंकं वाणिज्य बैंकय् स्थानान्तरण यायेत्यंगु खः ।

थौंकन्हय् राष्ट्र बैंकय् खाता चायेकातःगु संस्थान मध्य कर्मचारी सञ्चय कोष, नागरिक लगानी कोष, नेपाल टेलिकम, खाद्य संस्थान, नेपाल विद्युत प्राधिकरण लगायत दर्जनौं संस्थानया राष्ट्र बैंकय् चल्ती खाता चायेकातःगु खः । केन्द्रीय बैंकय् चायेकातःगु चल्ती खाता पाखें संस्थानयात ब्याज धाःसा वनीमखु । तर आः थ्व ध्यबा वाणिज्य बैंकय् छ्वल धाःसा संस्थानयात ब्याज नं वनीगु व आः दयाच्वंगु तरलता नं म्हो जुइगु जुयाः
राष्ट्र बैंकं थ्व नीति काःगु खः ।

लिपांगु इलय् बैकिङ प्रणालीइ तरलता खने दयेवं राष्ट्र बैंकं थःके दुगु ध्यबा वाणिज्य बैंकय् प्रवाह यायेगु तयारी याःगु खःसा उकी थीथी कथंया कानुनी जटिलता वःगुलिं उगु ज्या जुइ मफुगु खः । मौद्रिक नीतिया मध्यावधी समिक्षा यायेगु झ्वलय् राष्ट्र बैंकं तरलताया स्थिति तकं सुधार वइगु आंकलन यानाः सरकारी संस्थानया खाता बाणिज्य बैंकय् तयेगु निष्कर्ष पिकागु खः । लगानी योग्य पुँजीया अभाव दँय्दसं वयेगु यानाच्वंगु दुसा राष्ट्र बैंकं थज्याःगु समस्या ज्यंकेगु निंतिं सरकारी ढुकुटी दुगु ध्यबा वाणिज्य बैंकय् छ्वयेगु निंतिं अर्थ मन्त्रालय लिसे जानाः अध्ययन याःगु खः ।

सम्बन्धित बुखँ

LEAVE YOUR COMMENTS